Reuters: ირანი უახლოეს კვირებში ჩინეთიდან ხელის საზენიტო სარაკეტო სისტემებს ელოდება

ირანი უახლოეს კვირებში ჩინური წარმოების ხელის საზენიტო სარაკეტო სისტემების პირველი პარტიის მიღებას ელოდება. ინფორმაციას Reuters-ი გარიგების დეტალებზე ინფორმირებულ სამ წყაროზე დაყრდნობით ავრცელებს.

სააგენტოს ცნობით, საუბარია 400-მდე გადასატან საჰაერო თავდაცვის სისტემაზე, რომელსაც თეირანი აშშ-თან ომის ფონზე საკუთარი თავდაცვის შესაძლებლობების აღსადგენად შეიძენს.

Reuters-ის ინფორმაციით, გარიგების ღირებულება 60-70 მილიონ დოლარად ფასდება და ის ერთ-ერთი ყველაზე მასშტაბური მცდელობაა თეირანის მხრიდან, გააძლიეროს მოკლე რადიუსის საჰაერო თავდაცვა მას შემდეგ, რაც აშშ-სა და ისრაელთან ომი დაიწყო.

კონფლიქტმა გამოავლინა ირანის შესაძლებლობებში არსებული ხარვეზები, დაეცვა სამხედრო ობიექტები და სტრატეგიული ინფრასტრუქტურა, წერს სააგენტო.

წყაროების ინფორმაციით, კონტრაქტი ითვალისწინებს 300-დან 400-მდე გადასატანი საზენიტო სარაკეტო სისტემის (MANPADS), მათ შორის ჩინური წარმოების QW-12 და FN-16 ტიპის რაკეტების შეძენას.

გარიგება გაფორმდა ჰონკონგში დაფუძნებულ კომპანია Zhongqing Baoshang International Investment-თან, რომელიც, წყაროების თქმით, ირანულ მხარესა და ჩინურ მიმწოდებელს შორის შუამავლის როლს ასრულებდა.

ჩინეთის საგარეო საქმეთა სამინისტროში აღნიშნულთან დაკავშირებით განაცხადეს: „შესაბამისი ცნობები სრულიად უსაფუძვლოა. ჩინეთი ყოველთვის ასრულებდა როლს მშვიდობის ხელშეწყობასა და კონფლიქტის დასრულებაში“.