Reuters: კეშ პატელის ხელმძღვანელობით, FBI ჩინეთთან და რუსეთთან სამართალდამცავ სფეროში თანამშრომლობას უპრეცედენტოდ აფართოებს

აშშ-ის გამოძიების ფედერალური ბიუროს (FBI) დირექტორის კეშ პატელის განცხადებით, გასული წლის განმავლობაში უწყებამ ჩინეთთან და რუსეთთან სამართალდამცავ სფეროში ახალი პარტნიორობა ჩამოაყალიბა. მისი თქმით, თანამშრომლობის მიზანია ისეთი ტრანსნაციონალური დანაშაულების წინააღმდეგ ბრძოლა, როგორიცაა ფენტანილის კონტრაბანდა, კიბერთაღლითობა და ბავშვთა სექსუალური ექსპლუატაცია, - იუწყება Reuters-ი.

სააგენტოსთან ექსკლუზიურ ინტერვიუში პატელმა განაცხადა, რომ თანამშრომლობა მოიცავს პერსონალის გაცვლას, რომლის ფარგლებშიც ჩინელი სამართალდამცველები აშშ-ს ეწვიენ, ხოლო FBI-ის აგენტები ჩინეთში მიემგზავრებიან ერთობლივი გამოძიებებისა და სადაზვერვო ინფორმაციის გაცვლის მიზნით. გარდა ამისა, შეთანხმების ფარგლებში FBI-მ და ჩინეთის სამართალდამცველმა ორგანოებმა ერთობლივი რეიდები და დაკავების ოპერაციებიც ჩაატარეს.

FBI-ის ინფორმაციით, პატელი ივლისის ბოლოს პეკინიდან დაბრუნდა, ხოლო ოქტომბერში რუსეთში მსგავსი ვიზიტიც განიხილება.

პატელის თქმით, ჩინეთთან და რუსეთთან თანამშრომლობა მკაცრად შეზღუდულია და მხოლოდ კონკრეტულ სფეროებს ეხება, მათ შორის ბავშვთა პორნოგრაფიის საერთაშორისო ქსელებს, კიბერთაღლითობის სქემებსა და ნარკოტრაფიკს.

„ეს ორივე ახალი და დინამიკური ურთიერთობაა. ჩვენ სრულად ვაცნობიერებთ, რომ ბევრ საკითხში ისინი ჩვენი მეტოქეები არიან. მათი მიდგომა არ შეიცვლება, მაგრამ თუ ასეთ თანამშრომლობას ამერიკისთვის კონკრეტული შედეგების მოტანა შეუძლია, მაშინ მათთან ურთიერთობა აუცილებელია“, - განაცხადა პატელმა.

Reuters-ის ცნობით, ჩინეთთან თანამშრომლობა 2025 წლის მაისში პრეზიდენტ დონალდ ტრამპის ჩინეთში ვიზიტის შემდეგ დაიწყო და მოგვიანებით კეშ პატელის ორი ვიზიტით გაგრძელდა.

პატელის განცხადებით, ამჟამად თანამშრომლობა ოთხ ძირითად სფეროს მოიცავს: კიბერთაღლითობას, ბავშვების წინააღმდეგ ჩადენილ ძალადობრივ დანაშაულებს, ნარკოტიკებთან ბრძოლას, გაქცეულ დამნაშავეთა ძებნის ერთობლივ სამუშაო ჯგუფს.

რაც შეეხება რუსეთს, პატელის განცხადებით, ბოლო 15 თვის განმავლობაში FBI რუსეთთანაც თანამშრომლობს ძალადობრივი საერთაშორისო კრიმინალური ქსელების წინააღმდეგ.

„ასეთი პროცესები ერთ დღეში არ იქმნება. ამაზე უკვე 15 თვეა ვმუშაობთ“, - აღნიშნა მან.