Reuters: ლიბანში ისრაელის თავდასხმების შედეგად ყოველ 24 საათში 11 ბავშვი იღუპება ან სხვადასხვა დაზიანებებს იღებს

ისრაელის თავდასხმების შედეგად ლიბანში ყოველ 24 საათში ერთხელ საშუალოდ 11 ბავშვი იღუპება ან სხვადასხვა სახის დაზიანებას იღებს. ინფორმაციას Reuters-ი გაეროს მონაცემებზე დაყრდნობით ავრცელებს.

სააგენტოს ცნობით, ხუთშაბათს ღამე ისრაელმა ლიბანის სამხრეთით განლაგებულ ქალაქებსა და სოფლებზე მასირებული იერიში მიიტანა. ხუთშაბათს ბეირუთის სამხრეთ ნაწილიც დაიბომბა.

UNICEF-ის მონაცემების თანახმად, რომელიც თავის მხრივ ლიბანის ჯანდაცვის სამინისტროს ინფორმაციას ეყრდნობა, უკანასკნელ შვიდ დღეში ლიბანში დაიღუპა ან დაიჭრა 77 ბავშვი. მას შემდეგ, რაც 16 აპრილს ლიბანსა და ისრაელს შორის ცეცხლის შეწყვეტის რეჟიმი ამოქმედდა, 55 ბავშვი დაიღუპა, ხოლო 212 დაშავდა.

UNICEF-ის პრესსპიკერი რიკარდო პირესი ყველა მხარეს ცეცხლის შეწყვეტის რეჟიმის დაცვისკენ მოუწოდებს.

„საერთაშორისო ჰუმანიტარული სამართლის მიხედვით, ყველა ბავშვი და სამოქალაქო ინფრასტრუქტურა დაცული უნდა იყოს“, - ციტირებს Reuters-ი პირესს.