Reuters: რუსეთის იერიშებს კიევსა და კიევის ოლქში ცხრა ადამიანი ემსხვერპლა, 14-ზე მეტი კი დაშავდა
რუსეთის მიერ კიევსა და კიევის ოლქზე განხორციელებულ საჰაერო იერიშებს ცხრა ადამიანი ემსხვერპლა, 14-ზე მეტი კი დაშავდა. ინფორმაციას Reuters-ი ავრცელებს.
სააგენტოს ცნობით, რუსეთის დარტყმები უკრაინის დედაქალაქსა და მის შემოგარენზე უკვე ზედიზედ მეექვსე დღეა გრძელდება.
უკრაინის საგანგებო სიტუაციების სახელმწიფო სამსახურის ინფორმაციით, კიევში რვა ადამიანი დაიღუპა და ხუთი დაშავდა, მათ შორის სამი ბავშვია. დედაქალაქის სხვადასხვა რაიონში საჰაერო იერიშების შედეგად ხანძარი გაჩნდა.
კიევის ოლქის ქალაქ ბორისპოლში რაკეტებისა და დრონების თავდასხმის შედეგად საცხოვრებელი კორპუსი და ბიზნეს-ობიექტი დაზიანდა. კიევის საოლქო-სამხედრო ადმინისტრაციის უფროსის ტიმურ ტკაჩენკოს განცხადებით, დაიღუპა ერთი ადამიანი, ცხრა კი დაშავდა, მათ შორის ერთი ბავშვი.
კიევისა და კიევის ოლქის გარდა რუსეთი გვიან ღამით უკრაინის საზღვრებთან არსებულ ენერგეტიკულ და ლოგისტიკურ ინფრასტრუქტურას დაესხა თავს. მორიგი დარტყმის შედეგად რუმინეთთან საზღვრის გადაკვეთა დროებით შეწყდა. საუბარია დუნაის სანაპიროზე მდებარე ორლივკის სასაზღვრო-გამშვებ პუნქტზე.
იმედი
წყარო: imedinews.ge