Reuters: ტაილანდის სკოლაში სროლის შედეგად ორი ადამიანი დაიღუპა

ტაილანდში, სკოლაში მომხდარი სროლის შედეგად, სულ მცირე ერთი მასწავლებელი დაიღუპა, ოთხი ადამიანი კი დაშავდა. ინფორმაციას Reuters-ი ავრცელებს.

ადგილობრივი ხელისუფლების ინფორმაციით, ცეცხლი სკოლის მოსწავლემ გახსნა, რომელმაც მოგვიანებით სიცოცხლე თვითმკვლელობით დაასრულა.

ნონთაბურის პროვინციის პოლიციის უფროსმა, ვიცე-პოლკოვნიკმა დეჩრაპი კონგდიმ Reuters-ს დაუდასტურა, რომ დაღუპულებს შორის თავდამსხმელიც არის. მისივე თქმით, დაშავებულთა შორის ერთი მასწავლებელი და სამი მოსწავლეა.

შემთხვევა ბანგ კრუაის რაიონში, ნონთაბურის პროვინციაში, ბანგკოკის ჩრდილოეთით მოხდა. პოლიციის ინფორმაციით, თავდამსხმელი ამავე სკოლის მოსწავლე იყო.

18 წლის ერთ-ერთმა მოსწავლემ Reuters-ს განუცხადა, რომ თავდაპირველად ეგონა, თითქოს ფოიერვერკის ხმები ესმოდა. „თავიდან არ მიფიქრია, რომ ეს იარაღიდან გასროლა იყო. ბევრი გასროლის ხმა ისმოდა - ბახ, ბახ, ბახ. შემდეგ ყველაფერი მიწყნარდა, ცოტა ხანში კი სროლა ისევ განახლდა“, - თქვა მან.