რევაზ სოხაძე: თელავში დასასრულს უახლოვდება ღვარცოფის შედეგად წარმოქმნილი შედეგების ლიკვიდაცია, თუმცა ამით პროცესი არ დასრულდება, მთავრობისგან გვაქვს დავალება, რომ დაზიანებული არხი მთლიანად მოწესრიგდეს
ინფრასტრუქტურის მინისტრმა რევაზ სოხაძემ ბოლო პერიოდში რეგიონებში წყალდიდობებისა და წყალმოვარდნების შედეგად წარმოქმნილ პრობლემებზე გადაცემაში „დღის ქრონიკა“ ისაუბრა. მინისტრმა განმარტა, რა ეტაპზეა თელავსა და ლენტეხში მიმდინარე სამუშაოები.
„თელავში დასასრულს უახლოვდება გაწმენდითი სამუშაოები, ღვარცოფის შედეგად წარმოქმნილი შედეგების ლიკვიდაცია, თუმცა, ამით პროცესი არ დასრულდება. მთავრობისგან გვაქვს დავალება, რომ მთლიანად მოწესრიგდეს დაზიანებული არხი. ჩვენი სამინისტრო აქტიურად მუშაობს იმისათვის, რომ გაწმენდითი სამუშაოების პირველი ეტაპი რაც შეიძლება მალე დასრულდეს.
ლენტეხში ორი დღის წინ ხიდი ჩაიხერგა და წყალი ხიდზე გადმოვიდა. გაწმენდითი სამუშაოები იქაც აქტიურად მიმდინარეობს, წყალი უკვე კალაპოტშია მოქცეული. ამჟამად მიმდინარეობს ხიდის მოწესრიგების სამუშაოები. ამ ეტაპისთვის გადაადგილების შეფერხება არ არსებობს“, - აღნიშნა რევაზ სოხაძემ.
სტიქიამ 12 ივლისის ღამეს თელავში პრობლემები შექმნა.
იმედი
წყარო: imedinews.ge