რომან კაკულია: შეერთებულ შტატებთან მიმართებაში ჩვენ საკმაოდ დაგვიგროვდა გამოცდილება და ამ გამოცდილების გათვალისწინება აუცილებელია. დარწმუნებული ვარ, ხელისუფლება ამ გამოცდილების გათვალისწინებით აპირებს გადატვირთვასაც და ყველა იმ შესაძლებლობის გამოყენებაზე ფიქრს, რაზეც ბატონი ტრამპი საუბრობს

ამერიკის შეერთებულ შტატებთან მიმართებაში ჩვენ საკმაოდ დაგვიგროვდა გამოცდილება და ამ გამოცდილების გათვალისწინება აუცილებელია. დარწმუნებული ვარ, რომ ხელისუფლება დღეს ამ გამოცდილების გათვალისწინებით აპირებს გადატვირთვასაც და ყველა იმ შესაძლებლობის გამოყენებაზე ფიქრს, რაზეც ბატონი ტრამპი საუბრობს, - განაცხადა საზოგადოებრივი მოძრაობა „პოლიტიკური არჩევანის“ დამფუძნებელმა, რომან კაკულიამ გადაცემაში „დღის ქრონიკა“ ამერიკის შეერთებულ შტატებთან ურთიერთობაზე, მათ შორის პრეზიდენტ ტრამპის მიერ დამოუკიდებლობის დღის მილოცვაზე საუბრისას.

მისი თქმით, ამ შემოთავაზებას საქართველომ დადებითი ტენდენციით უნდა უპასუხოს და შეერთებულ შტატებთან ურთიერთობის შესაძლებლობები მაქსიმალურად უნდა იყოს გამოყენებული.

მან საქართველოს წინაშე არსებული გამოწვევების სხვადასხვა პრიზმაში გაანალიზების აუცილებლობაზეც ისაუბრა. რომან კაკულიამ, მათ შორის აშშ-ის უსაფრთხოების სტრატეგიის დოკუმენტის, კონკრეტულად კი ჩინეთთან დაკავშირებული მიდგომების გათვალისწინებაზე გაამახვილა ყურადღება.

„ჩვენ ხშირად ამერიკასთან, სხვებთანაც დაუზუსტებელმა მომენტებმა, რომელთა რეალობაც მოგვიანებით გაირკვა, სიკეთე არ მოგვიტანა. ამიტომ როდესაც ვამბობ, რომ არსებობს გამოცდილება, ეს გამოცდილება პირველ რიგში არის ის, რომ ჩვენ არ გვჭირდება და ძალიან სახიფათოა დაუზუსტებელი მომენტების არსებობა ამ ურთიერთობებში. შეერთებული შტატები დიდი ქვეყანაა და მათგან გამოწვდილი ხელი ძალიან კარგია, მაგრამ ხომ ვხედავთ, როგორი მსოფლიოა დღეს. ამიტომ აუცილებელია, არ გავიმეოროთ წარსულის შეცდომები და ვგულისხმობ სწორედ დაუზუსტებელი მომენტების არსებობას დიდ ურთიერთობებში,“, - აღნიშნა რომან კაკულიამ.

ამერიკის შეერთებული შტატების პრეზიდენტმა დონალდ ტრამპმა, საქართველოს პრეზიდენტს დამოუკიდებლობის დღე მიულოცა. როგორც აშშ-ის პრეზიდენტის მილოცვაშია ნათქვამი, ეს წელი ახალ შესაძლებლობებს იძლევა ამერიკელ და ქართველ ხალხს შორის მეგობრული კავშირების განსაახლებლად და ჩვენი ქვეყნების უსაფრთხოებისა და კეთილდღეობის ხელშეწყობისთვის.