რუმინეთის პრეზიდენტი სანდუს განცხადებაზე რუმინეთთან შესაძლო გაერთიანების შესახებ: მზად ვართ - ახლა ყველაფერი მოლდოვის მოქალაქეების დემოკრატიულ მისწრაფებებსა და სურვილზეა დამოკიდებული
რუმინეთის პრეზიდენტი, ნიკუშორ დანი ოთხშაბათს გამოეხმაურა მოლდოვის პრეზიდენტის, მაია სანდუს განცხადებებს, რომელმაც რუმინეთთან გაერთიანების თემა მოლდოვის ევროპული ინტეგრაციის დაჩქარების შესაძლო გზად განიხილა. ინფორმაციას ამის შესახებ მოლდოვური მედია ავრცელებს.
ამ საკითხთან დაკავშირებით რუმინეთის პოზიციის შესახებ დასმულ კითხვაზე, ნიკუშორ დანმა 2018 წელს რუმინეთის პარლამენტის მიერ ერთხმად მიღებული გადაწყვეტილება მოიხმო.
„რუმინეთის მხრიდან, ვფიქრობ, არაფერი შეცვლილა პარლამენტის 2018 წლის ერთსულოვან კენჭისყრასთან შედარებით, სადაც ნათქვამი იყო, რომ რუმინეთი მზად არის ნებისმიერ დროს, როდესაც ამას მოლდოვის რესპუბლიკის მოქალაქეები ისურვებენ“, - აღნიშნა მან.
რუმინეთის სახელმწიფოს მეთაურმა ხაზგასმით აღნიშნა, რომ გადაწყვეტილების მიღება, პირველ რიგში, მოლდოვის მოქალაქეებზეა.
„ახლა ეს დამოკიდებულია მოლდოვის მოქალაქეების მისწრაფებებსა და დემოკრატიულ ნებაზე, რასაც ჩვენ, რა თქმა უნდა, პატივს ვცემთ. თუ ამ პროექტის გარშემო უმრავლესობა ჩამოყალიბდება, ჩვენ მზად ვართ“, - დასძინა მან.
იმედი
წყარო: imedinews.ge