რუსეთმა კიევი დაბომბა. დაიღუპა 5 და დაშავდა 40 ადამიანი

რუსეთის შეიარაღებულმა ძალებმა უკრაინის დედაქალაქი დაბომბა, რის შედეგადაც ხუთი ადამიანი დაიღუპა, ხოლო 40 დაშავდა, მათ შორისაა ერთი თვის ჩვილი. ინფორმაციას უკრაინული მედია ავრცელებს.

მედიის ცნობით, მაშველები კიდევ 10 ადამიანს ეძებენ.

„დარნიცის რაიონში დაღუპულთა რიცხვი ოთხამდე გაიზარდა. მრავალსართულიანი სახლის ჩამოშლილი სადარბაზოდან ამოყვანილია 21 და 30 წლის ორი მამაკაცის ცხედარი და აგრეთვე ერთი გარდაცვლილი ქალბატონი, რომლის ვინაობაც ახლა დგინდება“, - ციტირებს მედია კიევის პოლიციას.

სამართალდამცველების განცხადებით, კიდევ ერთი ადამიანი საავადმყოფოში გარდაიცვალა. მოგვიანებით ცნობილი გახდა, რომ დაღუპულთა რიცხვი ხუთამდე გაიზარდა.

როგორც კიევის მერმა, ვიტალი კლიჩკომ განაცხადა, დაბომბვის შედეგად ყველაზე მეტად კიევის დარნიცის რაიონი დაზიანდა, სადაც საერთო ჯამში 18 ბინა განადგურდა.

მაშველები ნანგრევებში მოყოლილ ადამიანების ამ დრომდე ეძებენ. კლიჩკოს განცხადებით, კიევის მარცხენა სანაპიროზე მოსახლეობას სასმელი წყალი შეფერხებით მიეწოდება.