რუსეთმა კიევზე სარაკეტო იერიში მიიტანა

რუსეთმა კიევს ბალისტიკური რაკეტებით დაარტყა. ქალაქის მერმა, ვიტალი კლიჩკომ განაცხადა, რომ ხანძარი გაჩნდა გოლოსეევის რაიონში მდებარე საწყობებში, დარნიცკის რაიონში კი ავტომობილებს ცეცხლი გაუჩნდა. კლიჩკოს ინფორმაციით, ადამიანები არ დაშავებულან.

რუსეთის თავდაცვის სამინისტრომ 14 ივლისის დილას განაცხადა, რომ „კიევში განადგურდა სამხედრო მრეწველობის საწარმოები, რომლებიც მონაწილეობენ სხვადასხვა ტიპის რაკეტებისა და უპილოტო საფრენი აპარატების შემუშავებასა და წარმოებაში“.

რუსეთის სამხედრო უწყების მტკიცებით, იერიში ასევე მიიტანეს „ოდესის ოლქის საპორტო ინფრასტრუქტურის ობიექტებზე, რომლებიც უკრაინის შეიარაღებული ძალების საწვავ-საპოხი მასალების გადმოტვირთვისა და შენახვისთვის გამოიყენება“. ოდესის ოლქის ხელისუფლების ინფორმაციით, რუსულმა დრონებმა ერთ-ერთი საწარმოს ტერიტორიაზე 11 სატვირთო ავტომობილი, ავტოგასამართი სახელოსნოები და საწვავმზიდი დააზიანეს.