სამსახურებრივი უფლებამოსილების ძალადობით გადამეტების ფაქტზე დაკავებული სამართალდამცველებისთვის აღკვეთის ღონისძიების შეფარდებაზე სასამართლო დღეს იმსჯელებს

ექვსივე დაკავებულ სამართალდამცველს პროკურატურამ ბრალი ოფიციალურად უკვე წაუყენა, დღეს კი სასამართლო მათთვის აღკვეთის ღონისძიების შეფარდებაზე იმსჯელებს. პროკურატურამ ისინი სამსახურებრივი უფლებამოსილების ძალადობით გადამეტების ფაქტზე გუშინ დააკავა. სამართალდამცველები დროებითი მოთავსების იზოლატორებში გადაიყვანეს. ნაწილი ხაშურში, ნაწილი კი თბილისში. 6-ვე დაკავებული დუმილს ინარჩუნებს.

შიდა ქართლისა და მცხეთა-მთიანეთის საოლქო პროკურატურის საგამოძიებო სამმართველოს მიერ, შინაგან საქმეთა სამინისტროს გენერალურ ინსპექციასთან კოორდინაციით ჩატარებული გამოძიებით დადგინდა, რომ ბრალდებულებმა 27 მაისს გორში, მოქალაქის დაკავებისას, ძალადობით გადაამეტეს სამსახურებრივ უფლებამოსილებას. ძალადობის შედეგად, არსებითად დაირღვა დაზარალებულის უფლებები, ამასთან ზიანი მიადგა მის ჯანმრთელობას.

დაკავებულებს ბრალდება სისხლის სამართლის კოდექსის 333-ე მუხლის მესამე ნაწილის „ბ“ ქვეპუნქტით (სამსახურებრივი უფლებამოსილების გადამეტება, ჩადენილი ძალადობით) წარედგინათ, რაც 5-დან 8 წლამდე თავისუფლების აღკვეთას ითვალისწინებს. გამოძიება გრძელდება.