საქალაქო სასამართლოში 7 ნოემბრის საქმეზე, მიხეილ სააკაშვილის პროცესზე, ბრალდების მოწმე დაიკითხა
საქალაქო სასამართლოში 7 ნოემბრის საქმეზე მიხეილ სააკაშვილის პროცესი გაიმართა. დაიკითხა ბრალდების მოწმე, რომელმაც დეტალურად აღწერა 7 ნოემბერს განვითარებული მოვლენები და სპეცდანიშნულების რაზმის ტელეკომპანია „იმედში“ შეჭრა.
ბრალდებულმა პროცესზე საქმესთან დაკავშირებით არ ილაპარაკა.
„მოწმის სახით დაიკითხა 2007 წლის მდგომარეობით კონსტიტუციური უსაფრთხოების დეპარტამენტის სპეციალური დანიშნულების რაზმის ხელმძღვანელი პირი, რომელმაც აღწერა დარბევის ის სისასტიკე და ძალადობა, რასაც ადგილი ჰქონდა რუსთაველის გამზირზე და შემდგომი ეპიზოდი იყო უკვე „ტელეიმედში“ შეჭრის ეპიზოდი. მან ისაუბრა ჟურნალისტებზე, რა მდგომარეობაშიც იყვნენ და გულწრფელად რაც აღმოხდა სიტყვები იყო - „საკონცენტრაციო ბანაკს“ ჰგავდა, ისეთ მდგომარეობაში დახვდნენ ჟურნალისტები.
დაადასტურა ის ფაქტო, რომ იმ დროინდელი შსს-ს სხვადასხვა დანაყოფის წევრები მიდიოდნენ და უწმაწური სიტყვებით მოიხსენიებდნენ ბადრი პატარკაციშვილს. ასევე, არის შეძახილები იმჟამინდელი პრეზიდენტის მიმართ და დაადასტურა, რომ ისინი იყვნენ ძირითადად კონსტიტუციური უსაფრთხოების დეპარტამენტის თანამშრომლები, ასევე სხვა დანაყოფების თანამშრომლები. ასევე, ის, რომ პირველი შეძახილი წამოვიდა დათა ახალაიას ინიციატივით და ისინიც აჰყვნენ“, - აღნიშნა ჟურნალისტებთან საუბრისას პროკურორმა, ლაშა კოტრიკაძემ.
