სენატორი ლინდსი გრემი: კანონპროექტის ტექსტი, რომელიც რუსეთის წინააღმდეგ ახალი მასშტაბური სანქციების დაწესებას ითვალისწინებს, ტრამპის ადმინისტრაციასთან შეთანხმებულია

აშშ-ის კანონპროექტის ტექსტი, რომელიც რუსეთის წინააღმდეგ ახალი მასშტაბური სანქციების დაწესებას ითვალისწინებს, ტრამპის ადმინისტრაციასთან შეთანხმებულია. მოსალოდნელია, რომ კონგრესი მას უახლოეს ხანში დაამტკიცებს, - განაცხადა კანონპროექტის ავტორმა, სენატორმა ლინდსი გრემმა კიევში გამართულ ბრიფინგზე.

დოკუმენტი, რომელზეც სენატორები ლინდსი გრემი და რიჩარდ ბლუმენტალი თითქმის ორი წელია მუშაობენ, მიზნად ისახავს პრეზიდენტ დონალდ ტრამპისთვის დამატებითი ბერკეტების გადაცემას, რათა მან რუსეთის მიერ უკრაინის წინააღმდეგ წარმოებული ომი რაც შეიძლება სწრაფად დაასრულოს.

კანონპროექტი აშშ-ის პრეზიდენტს უფლებას მისცემს, დააწესოს ტარიფები და მკაცრი შეზღუდვები ნებისმიერი ქვეყნის მიმართ, რომელიც კვლავ ყიდულობს რუსულ ნავთობსა და გაზს, ასევე იმ უცხოური კომპანიებისა და მთავრობების მიმართ, რომლებიც კრემლს არსებული სანქციების გვერდის ავლის პროცესში ეხმარებიან.