შალვა პაპუაშვილი ალბანეთის პარლამენტის ვიცე-სპიკერთან შეხვედრაზე: ვისაუბრეთ იმ გზაზე, რომელსაც ალბანეთი გადის ევროკავშირში ინტეგრაციის პროცესში, ასევე, თუ რას აკეთებს საქართველო, როდესაც ბრიუსელს არჩეული აქვს კონფრონტაციის გზა

საქართველოს პარლამენტის თავმჯდომარემ შალვა პაპუაშვილმა მედიასთან იმ თემებზე ისაუბრა, რომლებზეც საუბარი შეეხო მისი და ალბანეთის პარლამენტის ვიცე-სპიკერის შეხვედრაზე. მისი განცხადებით, ამ თემებს შორის ორმხრივი ურთიერთობები და ევროპული ინტეგრაციის გზა იყო.

„დღეს პარლამენტის დელეგაცია ვასრულებთ მონაწილეობას ხმელთაშუაზღვის საპარლამენტო ასამბლეის ღონისძიებაში. დღეს მქონდა შესაძლებლობა, რომ ალბანეთის პარლამენტის ვიცე- სპიკერს შევხვედროდი, გვესაუბრა უპირველეს ყოვლისა ორმხრივ ურთიერთობაზე, რომელიც მნიშვნელოვანია, რომ გაღრმავდეს, როგორც საპარლამენტო დონეზე, ისე ქვეყნებს შორის ურთიერთობა.

შევთანხმდით, რომ გვექნება საპარლამენტო თანამშრომლობა, ურთიერთვიზიტების გაცვლა. რა თქმა უნდა, ვისაუბრეთ იმ გზაზე, რომელსაც ალბანეთი გადის ევროკავშირში ინტეგრაციის პროცესში, იმ სირთულეებზე, რომლებიც ახლავს ამ გზას, ასევე იმაზე, თუ რას აკეთებს საქართველო იმ გამოწვევების ფონზე, როდესაც სამწუხაროდ, ბრიუსელს არჩეული აქვს კონფრონტაციის გზა. ჩვენ მივყვებით იმ გეგმას, რომელიც ჩვენ გვაქვს დასახული. ასევე, ვისაუბრეთ ქვეყნებს შორის ეკონომიკურ თანამშრომლობაზე.

გარდა ამისა, დღეს მექნება ბოსნია-ჰერცეგოვინას პარლამენტის ვიცე-სპიკერთან შეხვედრის შესაძლებლობა, სადაც ორმხრივ ურთიერთობებსა და ევროპული ინტეგრაციის გზის სირთულეებსა და გამოწვევებზე ვისაუბრებთ“, - განაცხადა შალვა პაპუაშვილმა.