შალვა პაპუაშვილი ჩინეთ-საქართველოს ურთიერთობაზე: მნიშვნელოვანია, რომ მსოფლიოს მეორე ეკონომიკა ჩვენთვის გახსნილია თავისუფალი ვაჭრობისა და უვიზო მიმოსვლის სახით, ინიშნება პირდაპირი ფრენები საქართველოსა და ჩინეთს შორის, ეს ყველაფერი აღრმავებს ეკონომიკურ კავშირებს საქართველოსა და ჩინეთს შორის

საქართველოს პარლამენტის თავმჯდომარემ შალვა პაპუაშვილმა დღეს გამართულ ბრიფინგზე საქართველო-ჩინეთის ურთიერთობაზე ისაუბრა და აღნიშნა, რომ საქართველოსა და ჩინეთის ურთიერთობა ახალ ეტაპზე გადავიდა.

„ვნახეთ, რომ გუშინ წერილების გაცვლით საქართველოსა და ჩინეთს შორის ურთიერთობის ახალ ეტაპზე გადასვლა გაცხადდა. მნიშვნელოვანია, როდესაც მსოფლიოს მეორე ეკონომიკა ჩვენთვის გახსნილია თავისუფალი ვაჭრობის სახით, უვიზო მიმოსვლის სახით, ინიშნება პირდაპირი ფრენები საქართველოსა და ჩინეთს შორის, ეს ყველაფერი აღრმავებს ეკონომიკურ კავშირებს საქართველოსა და ჩინეთს შორის, ქართველი მეწარმეებისთვის ჩინეთის ბაზარი იხსნება და ეს თავისთავად გავლენას ახდენს ქვეყნის კეთილდღეობის ზრდაზე.

საქართველო, ეკონომიკური ზრდის ტემპებით რეგიონში არის ჩემპიონი, რაც საბოლოო ჯამში უზრუნველყოფს მოსახლეობის კეთილდღეობის ზრდას და უზრუნველყოფს უსაფრთხოების განმტკიცებას, რისი ბოლო შედეგიც ქვეყნის ტერიტორიული მთლიანობის აღდგენა უნდა იყოს“, - აღნიშნა შალვა პაპუაშვილმა.