შალვა პაპუაშვილი: იგივე ჯგუფი, რომელმაც საქართველოს წინააღმდეგ „ნამახვანჰესი 1“ მოაწყო, აწყობს „ნამახვანჰეს 2“-ს „იგლ ჰილსის“ პროექტთან დაკავშირებით - „ალტ ინფო“, „ნაციონალური მოძრაობა“, „ენჯეოები“. როგორც ჩანს, ქართველ პროევროპელებს ამ ევროპისკენ მივყავართ - ფაშისტური, ქსენოფობიური ევროპისკენ

იგივე ჯგუფი, რომელმაც საქართველოს წინააღმდეგ „ნამახვანჰესი 1“ მოაწყო, აწყობს „ნამახვანჰეს 2“-ს ამ პროექტთან [„იგლ ჰილსი“] დაკავშირებით - „ალტ ინფო“, „ნაციონალური მოძრაობა“, „ენჯეოები“. როგორც ჩანს, ქართველ პროევროპელებს ამ ევროპისკენ მივყავართ - ფაშისტური, ქსენოფობიური ევროპისკენ, - განაცხადა საქართველოს პარლამენტის თავმჯდომარემ შალვა პაპუაშვილმა.

ჟურნალისტმა ჰკითხა, რა მიზანი აქვს ე.წ. არაბიზაციის კამპანიას და არის თუ არა მცდელობა დაზიანდეს მასშტაბური პროექტი.

„თუ შევხედავთ იმ ჯგუფის შემადგენლობას, რომელიც ჩართულია ამ კამპანიაში, მიზნებს, აბსურდულ შინაარსს, მივხვდებით, რომ სახეზე გვაქვს „ნამახვანჰესი 2“ კამპანია, როგორც მაშინ, როდესაც მიზანი იყო ჩაშლილიყო ეკონომიკურად და ენერგეტიკული დამოუკიდებლობისთვის მნიშვნელოვანი პროექტი და მაშინ მოახერხეს ეს. არა მხოლოდ 400 მილიონი ლარის კომპენსაციაა ის ზიანი, რაც მიადგა საქართველოს, ზიანი მიადგა ენერგეტიკულ დამოუკიდებლობას ყალბი კამპანიით. გასაჩივრებულია და ჯერ ველით გადაწყვეტილებას. დღეის მდგომარეობით არის არბიტრაჟის გადაწყვეტილება. მაშინაც იყო ქსენოფობიური არგუმენტები, „ნაცმოძრაობის“ და „ალტ ინფოს“ ერთობა. დღესაც იგივეს ვხედავთ, რომ ისინი ერთ ფრონტზე არიან საქართველოს წინააღმდეგ.

სამწუხაროდ, 2020-21 წლებში საქართველო ვერ აღმოჩნდა ისეთი ძლიერი, რომ წინააღმდეგობა გაეწია გარედან დაგეგმილი კამპანიისთვის და მათ შეძლეს ჩვენი ქვეყნის ინტერესების დაზიანება. მას შემდეგ ბევრი რამ შეიცვალა, მათ შორის დაფინანსების ბევრი წყარო, რომელიც მიმართული იყო საქართველოს საწინააღმდეგოდ, ჩაიკეტა და სახელმწიფო დღეს გაცილებით ძლიერია, რომ არ დაუშვას ამგვარი აბსურდული კამპანია. იგივე ჯგუფი, რომელმაც საქართველოს წინააღმდეგ „ნამახვანჰესი 1“ მოაწყო, აწყობს „ნამახვანჰეს 2“-ს ამ პროექტთან [„იგლ ჰილსის“] დაკავშირებით - „ალტ ინფო“, „ნაციონალური მოძრაობა“, „ენჯეოები“. როგორც ჩანს, ქართველ პროევროპელებს ამ ევროპისკენ მივყავართ - ფაშისტური, ქსენოფობიური ევროპისკენ. ამიტომაც, ბუნებრივია, რომ ისინი „ალტ ინფოსთან“ ერთად გაერთიანდნენ და ახლა ვხედავთ ეს ორი ძალა, რომელიც ერთმანეთის მიმართ ანტაგონისტურად იყო განწყობილი, სინამდვილეში ერთ მხარეს არიან“, - აღნიშნა პაპუაშვილმა.

მისი თქმით, „ალტ ინფოს“ ერთ-ერთმა ლიდერმა, რომელიც დებატებშიც კი იყო მათ შორის პრემიერ-მინისტრთან, ტერმინი „არაბიზაცია“ ვერც კი ახსენა, რადგან ეს არის აბსურდული იარლიყი.

„რაც შეეხება შინაარსს, არაბიზაცია არის ტერმინი, „ალტ ინფოს“ ერთ-ერთმა ლიდერმა, რომელიც თავის დროზე პოლიტიკას ჩამოსცილდა და ახლა საკუთარი თავის რეაბილიტაციას ცდილობს, დებატებშიც კი იყო მათ შორის პრემიერ-მინისტრთან და ტერმინი „არაბიზაცია“ ვერც კი ახსენა, რადგან ეს არის აბსურდული იარლიყი, რომლითაც ცდილობენ „ნამახვანჰესი 2“-ის განმეორებას. თუ შევხედავთ საქართველოში მყოფი ადამიანების ეროვნულ შემდგენლობას, მთლიანად არაბული სამყარო რომ ავიღოთ, საქართველოს მოსახლეობის 0.3%-ია ჩვენთან მყოფი ადამიანები. არა მოქალაქეები, არამედ ყველა - ჯამში. ეს აქვე აჩვენებს ბრალდების აბსურდულობას“, - აღნიშნა პაპუაშვილმა.