შალვა პაპუაშვილი: რამდენიმე კვირის წინ გვქონდა კომუნიკაცია უკრაინის პარლამენტის თავმჯდომარესთან, რომელმაც ეს იდეა გაგვაცნო და რა თქმა უნდა, ჩვენ ყველანაირად მივესალმებით, რომ კანდიდატი ქვეყნების პარლამენტის თავმჯდომარეებს ჰქონდეთ პლატფორმა, სადაც შევძლებთ გაზიარებას იმ გამოცდილებისა, რომელიც ევროპული ინტეგრაციის პროცესში ქვეყნებს აქვთ

საქართველოს პარლამენტის თავმჯდომარე შალვა პაპუაშვილი ოფიციალური ვიზიტით სერბეთში იმყოფება, სადაც ევროკავშირის წევრობის კანდიდატი ქვეყნების პარლამენტების თავმჯდომარეთა პირველ (სადამფუძნებლო) კონფერენციაში მონაწილეობს.

როგორც შალვა პაპუაშვილმა სერბეთში ქართველ ჟურნალისტებს განუცხადა, მიესალმება რომ კანდიდატი ქვეყნების პარლამენტის თავმჯდომარეებს ჰქონდეთ პლატფორმა, სადაც შეძლებენ გაზიარებას იმ გამოცდილებისა, რომელიც ევროპული ინტეგრაციის პროცესში ქვეყნებს აქვთ.

„ვფიქრობ, ძალიან მნიშვნელოვანი ინიციატივაა. რამდენიმე კვირის წინ გვქონდა კომუნიკაცია უკრაინის პარლამენტის თავმჯდომარესთან, ბატონ სტეფანჩუკთან, რომელმაც ეს იდეა გაგვაცნო და რა თქმა უნდა, ჩვენ ყველანაირად მივესალმებით, რომ კანდიდატი ქვეყნების პარლამენტის თავმჯდომარეებს ჰქონდეთ პლატფორმა, სადაც შევძლებთ გაზიარებას იმ გამოცდილებისა, რომელიც ევროპული ინტეგრაციის პროცესში ქვეყნებს აქვთ. დადებითი და უარყოფითი გამოცდილებაც. მიხარია, რომ მალევე, რამდენიმე კვირაში, უკვე დღეს რეალობაა და პირველი ასეთი კონფერენცია იმართება, სადაც დაფუძნდება ევროკავშირის წევრობის კანდიდატი ქვეყნების პარლამენტის თავმჯდომარეების პლატფორმა და გვექნება შესაძლებლობა დღეს ვისაუბროთ როგორ წარმოგვიდგენია ჩვენ მომავალში ამ პლატფორმის მუშაობა როგორც პარლამენტის თავმჯდომარეების დონეზე, ისე სექტორული კომიტეტების დონეზე“, - აღნიშნა მან.

ჟურნალისტმა შალვა პაპუაშვილს ასევე ჰკითხა, ელოდება თუ არა, რომ დღეს მოისმენს კანდიდატი წევრების პარლამენტის თავმჯდომარეებისგან პოზიციას გაწევრიანების ახალ ვერსიასთან დაკავშირებით.

შალვა პაპუაშვილის თქმით, ერთი რამეა ცხადი, რომ ევროკავშირში გაწევრიანების პროცესი, ეს არ არის ცალმხრივი მოძრაობის გზა და არ უნდა იყოს ისე გაგებული, რომ კანდიდატი ქვეყნები არიან მხოლოდ ობიექტი გაწევრიანებისა.

„ვნახოთ, ჩვენ გვექნება საუბარი და რა თქმა უნდა, საინტერესოა კოლეგების მოსაზრების მოსმენა ყველა საკითხთან დაკავშირებით. ერთი რამეა ცხადი, რომ ევროკავშირში გაწევრიანების პროცესი, ეს არ არის ცალმხრივი მოძრაობის გზა და არ უნდა იყოს ისე გაგებული, რომ კანდიდატი ქვეყნები არიან მხოლოდ ობიექტი გაწევრიანებისა. ჩვენ ვართ ამის თანამონაწილე და ევროპის მომავლის თანაშემოქმედები. ასე რომ, ვფიქრობ კანდიდატ ქვეყნებსაც თავისი სიტყვა ეთქმით, როგორც თავად პროცესთან დაკავშირებით, ისე იმ გამოწვევებთან დაკავშირებით, რომელიც შესაძლოა პროცესს თან ახლდეს.

სხვადასხვა დროს მაქვს ხოლმე საშუალება, რომ მქონდეს საუბარი ჩემს კოლეგებთან, კანდიდატი ქვეყნების პარლამენტის თავმჯდომარეებთან და მქონდა შესაძლებლობა მათგანაც არაერთხელ მომესმინა იმ სირთულეებზე, რომლებსაც ისინი აწყდებიან გაწევრიანების პროცესში. დღეს გვექნება ამაზე მსჯელობა, მივიღებთ ერთობლივ დეკლარაციას ამ ფორუმთან დაკავშირებით და შემდეგ, იმედია რომ გვექნება შესაძლებლობა ინტენსიური თანამშრომლობა გვქონდეს ამ ფორუმის ფარგლებში“, - აღნიშნა პარლამენტის თავმჯდომარემ.