შალვა პაპუაშვილი: სასაცილოა, როდესაც ჯო უილსონი ფიქრობს, რომ მისი მოწოდება სჭირდება ტრამპის ადმინისტრაციას, რომ შეისწავლოს მსოფლიოს ნებისმიერ კუთხეში იმ ქვეყნების გავლენა, რომლებთანაც ამერიკის შეერთებული შტატები დღეს არის კონკურენციაში - ყურადღებას ნუ მივაქცევთ ამ ადამიანს

ეს ამერიკის შეერთებული შტატების საქმეა, რას შეისწავლის და რა თქმა უნდა, სასაცილოა, როდესაც ჯო უილსონი ფიქრობს, რომ მისი მოწოდება სჭირდება ტრამპის ადმინისტრაციას, რომ შეისწავლოს მსოფლიოს ნებისმიერ კუთხეში იმ ქვეყნების გავლენა, რომლებთანაც ამერიკის შეერთებული შტატები დღეს არის კონკურენციაში, - განაცხადა საქართველოს პარლამენტის თავმჯდომარემ.

შალვა პაპუაშვილმა ასე უპასუხა ჟურნალისტის კითხვას ამერიკის კონგრესის წარმომადგენელთა პალატის მიერ მიღებულ დოკუმენტში - ამერიკის ეროვნული თავდაცვის ავტორიზაციის აქტში, საქართველოს შესახებ ჯო უილსონის ავტორობით შესული შესწორებების შესახებ, რომლებშიც ჩანაწერებში მოთხოვნილია რუსეთისა და ჩინეთის სადაზვერვო სტრუქტურების დადგენა და მათი გავლენების შეფასება.

პარლამენტის თავმჯდომარემ აღნიშნა, რომ ამას აშშ-ის ადმინისტრაცია აკეთებს და ჯო უილსონის შეხსენება არ სჭირდება.

„ჩვენ გვაქვს ძალიან კეთილმეგობრული რჩევა ჩვენი ამერიკელი პარტნიორებისათვის, ყურადღება არ მივაქციოთ ჯო უილსონს. ის არის ადამიანი, რომელიც ეუთოში რომ იყო ცოტა ხნის წინ და მისივე დელეგაციის ხელმძღვანელმა კონგრესიდან, თვითმფრინავში აღარ ჩაისვა, ისეთი რამ ჩაიდინა ეუთოში. დელეგაციის ხელმძღვანელმაც კი მიმოწერაში გაკიცხა და გააკრიტიკა ის და უკან დასაბრუნებლად თვითმფრინავში აღარ ჩაისვა. ეს ასეთი ადამიანია და რა ვქნათ. ჩვენ ზოგადად გვაქვს რჩევა, ყურადღებას ნუ მივაქცევთ ამ ადამიანს“, - განაცხადა შალვა პაპუაშვილმა.