შალვა პაპუაშვილი ტექნოლოგიური ჰაბის გახსნაზე: თუკი სახელმწიფოს უნდა, რომ ჰქონდეს სწრაფი და მდგრადი ეკონომიკური განვითარებაა, ამ სექტორებში უნდა მოახდინოს ინვესტირება

საქართველოს პარლამენტის თავმჯდომარემ, შალვა პაპუაშვილმა მედიასთან ქუთაისში, საქართველოს ეკონომიკისა და მდგრადი განვითარების სამინისტროს ინოვაციების და ტექნოლოგიების სააგენტოს პირველი ტექნოლოგიური ჰაბის გახსნა შეაფასა და აღნიშნა, რომ თუკი სახელმწიფოს უნდა, რომ ჰქონდეს სწრაფი და მდგრადი ეკონომიკური განვითარება, ამ სექტორებში უნდა მოახდინოს ინვესტირება.

„თანამედროვე სამყაროში სწორედ ეს მიმართულებებია, სადაც თუკი სახელმწიფოს უნდა, რომ ჰქონდეს სწრაფი და მდგრადი ეკონომიკური განვითარებაა, ამ სექტორებში უნდა მოახდინოს ინვესტირება. საქართველო ამ მხრივ არის მოწინავე. ჩვენთან IT ტექნოლოგიების მხრივ ბიზნესის განვითარებას ნახტომისებური ხასიათი ჰქონდა, განსაკუთრებით პანდემიის დროს და შემდეგ, როდესაც უცხოეთიდან IT სპეციალისტების შემოსვლა მოხდა საქართველოში. საქართველო, როგორც მიმზიდველი სივრცე და ქვეყანა არის დღემდე IT მომსახურების წარმოებისთვის და ამ მხრივ ეკონომიკასა და ბიუჯეტში შენატანი რეკორდულ მაჩვენებელზეა.

შესაბამისად, სახელმწიფომაც ყველანაირად უნდა შეუწყოს ხელი, იქნება ეს ინფრასტრუქტურულად თუ სხვა საკანონმდებლო ჩარჩოთი, რომ საქართველო ამ სფეროსთვის მომხიბვლელი იყოს“, - აღნიშნა პაპუაშვილმა.

ქუთაისში საქართველოს ეკონომიკისა და მდგრადი განვითარების სამინისტროს ინოვაციების და ტექნოლოგიების სააგენტოს პირველი ტექნოლოგიური ჰაბი 24 ივლისს ოფიციალურად გაიხსნა.