შეფასებისა და გამოცდების ეროვნული ცენტრის დირექტორი თამარ მემანიშვილი ქუთაისის აკაკი წერეთლის სახელობის სახელმწიფო უნივერსიტეტში აბიტურიენტებს შეხვდა
შეფასებისა და გამოცდების ეროვნული ცენტრის დირექტორი თამარ მემანიშვილი ცენტრის წარმომადგენლებთან ერთად 2026 წლის გამოცდებისთვის მოსამზადებელი საინფორმაციო კამპანიის ფარგლებში, ქუთაისის აკაკი წერეთლის სახელობის სახელმწიფო უნივერსიტეტში აბიტურიენტებსა და მაგისტრანტობის კანდიდატებს შეხვდა. ინფორმაციას შეფასებისა და გამოცდების ეროვნული ცენტრი ავრცელებს.
შეხვედრაზე განხილული იყო გამოცდებთან დაკავშირებული მნიშვნელოვანი საკითხები, რომლებიც რეგისტრაციის პროცესისა და საგამოცდო ეტაპების სწორად დაგეგმვას უკავშირდება. მონაწილეებს მიეწოდათ მათთვის საინტერესო ინფორმაცია, რაც ხელს შეუწყობს პროცესების დროულ და ეფექტიან ორგანიზებას.
შეხვედრა დისკუსიის რეჟიმში წარიმართა, რომელსაც 400-ზე მეტი აბიტურიენტი და მაგისტრანტობის კანდიდატი ესწრებოდა.
ცენტრის დირექტორმა თამარ მემანიშვილმა განსაკუთრებული ყურადღება გაამახვილა საგანმანათლებლო პროგრამების არჩევის წესსა და კონკურსის პრინციპზე. მისი განცხადებით, აბიტურიენტებს საგანმანათლებლო პროგრამების არჩევა, დამატება, წაშლა და პრიორიტეტების გადანაცვლება აპელაციების შედეგების ოფიციალურად გამოქვეყნებიდან მომდევნო დღის 18:00 საათამდე შეუძლიათ.
მისივე განმარტებით, აღნიშნული პერიოდი წარმოადგენს განსაზღვრულ ვადას, რომლის ფარგლებშიც აპლიკანტებს აქვთ შესაძლებლობა, საკუთარი არჩევანი დააზუსტონ და საბოლოოდ ჩამოაყალიბონ სასურველი საგანმანათლებლო პროგრამების ჩამონათვალი.ამასთან, პროგრამების რაოდენობა შეზღუდული არ არის, რაც არჩევანის თავისუფლებას უზრუნველყოფს და აბიტურიენტებს აძლევს საშუალებას, მათ ინტერესებზე მორგებული პრიორიტეტები განსაზღვრონ.
კამპანიის ფარგლებში საინფორმაციო შეხვედრები აპლიკანტთა ინფორმირებულობის გაზრდასა და საგამოცდო პროცესის გამჭვირვალობას უზრუნველყოფს.
