შვედეთი უკრაინას Gripen-ის ტიპის 16 გამანადგურებელს გადასცემს

შვედეთის ხელისუფლება უკრაინულ მხარეს Gripen-ის ტიპის 16 ერთეულ გამანადგურებელს გადასცემს და კიდევ 20 ერთეული უახლესი Gripen E-ტიპის თვითმფრინავის აწყობაში დაეხმარება. ინფორმაციას უკრაინული მედია ავრცელებს.

შეთანხმება თვითმფრინავების გადაცემის შესახებ უკრაინის პრეზიდენტის ვოლოდიმირ ზელენსკის შვედეთში ვიზიტის ფარგლებში გაფორმდა.

„უკრაინამ მკაფიოდ განსაზღვრა Gripen-ი, როგორც საკუთარი სამხედრო-საჰაერო ძალების პრიორიტეტული ვარიანტი გრძელვადიან პერსპექტივაში და ის მზადაა აგრეთვე Gripen E-ს უახლესი ვერსიაც იყიდოს“, - განაცხადა შვედეთის პრემიერ-მინისტრმა ულფ კრისტერსონმა ზელენსკისთან გამართულ ერთობლივ პრესკონფერენციაზე.

როგორც უკრაინული მედია იუწყება, უკრაინული მახარე შვედეთს თვითმფრინავების მიწოდების სანაცვლოდ 2,5 მილიარდ ევროს გადაუხდის. ფულს ევროკავშირის კრედიტით მოიზიდავენ.

თვითმფრინავების პირველ პარტიას კიევი 2027 წლის დასაწყისში მიიღებს, ხოლო დანარჩენ 20 საჰაერო ხომალდს - 2030 წლიდან.