სი ძინპინმა და ვლადიმერ პუტინმა სტრატეგიული კოორდინაციის გაძლიერებისა და მეგობრული თანამშრომლობის გაღრმავების შეთანხმებას მოაწერეს ხელი
პეკინში სი ძინპინისა და ვლადიმერ პუტინის შეხვედრა დასრულდა. ამის შემდეგ ჩინეთისა და რუსეთის ლიდერებმა 20-ზე მეტ დოკუმენტს მოაწერეს ხელი, მათ შორის პეკინსა და მოსკოვს შორის სტრატეგიული კოორდინაციის შემდგომი გაძლიერებისა და „კეთილმეზობლური და მეგობრული თანამშრომლობის გაღრმავების“ შესახებ.
ასევე ხელმოწერილია შეთანხმებები ვაჭრობის, ტექნოლოგიების, ინტელექტუალური საკუთრებისა და სამეცნიერო კვლევების სფეროებში. ხელმოწერის ცერემონიის შემდეგ პუტინმა და სიმ განცხადებები გააკეთეს.
„ხელმოწერის ცერემონიის დასრულების შემდეგ სი ძინპინმა განაცხადა, რომ ჩინეთ-რუსეთის ურთიერთობებმა „სტრატეგიული პარტნიორობის უმაღლეს დონეს“ მიაღწია. მისივე თქმით, ორი ქვეყანა ერთმანეთს ურთიერთპატივისცემით ეპყრობა, როგორც თანასწორებს და ერთმანეთისთვის სტრატეგიულ დასაყრდენებად უნდა დარჩნენ.
თავის მხრივ, პუტინმა განაცხადა, რომ რუსეთი და ჩინეთი დამოუკიდებელი საგარეო პოლიტიკის წარმოების ერთგულები არიან და საერთაშორისო ასპარეზზე მასტაბილიზებელ როლს ასრულებენ. ჟურნალისტებს კითხვების დასმის შესაძლებლობა არ მიეცათ.
არსებული ინფორმაციით, ლიდერები მოგვიანებით ასევე საერთაშორისო საკითხებს განიხილავენ, მათ შორის ვითარებას უკრაინასა და ირანში და ამერიკასთან ურთიერთობებს.
