Spotify AI-არტისტების პროფილების მონიშვნას დაიწყებს - მათ მუსიკას რეკომენდაციებიდან ამოიღებენ

სექტემბრის შუა რიცხვებიდან მუსიკალური სტრიმინგ-სერვისი Spotify დაიწყებს აღნიშვნის - AI Persona დამატებას იმ შემსრულებლების პროფილებზე, რომელთა საჯარო პერსონაც, სავარაუდოდ, ხელოვნური ინტელექტის მიერ არის შექმნილი, - წერს Variety კომპანიაზე დაყრდნობით.

ტეგი გამოჩნდება არტისტის პროფილში, ძიების შედეგებში და პლეილისტებში მისი სახელის გვერდით. ასეთი შემსრულებლების მუსიკას Spotify-ს ალგორითმული რეკომენდაციებიდან ამოიღებენ.

პროფილის ავტორებს შეეძლებათ თავად განაცხადონ, რომ AI-პერსონას იყენებენ. დანარჩენ შემთხვევებში გადაწყვეტილებას Spotify-ს მოდერატორები ხელოვნური ინტელექტის ინსტრუმენტების გამოყენებით შემოწმების შემდეგ მიიღებენ.

„ნამდვილი კავშირი არტისტსა და თაყვანისმცემელს შორის მხოლოდ ნდობასა და ავთენტურობაზე შეიძლება დამყარდეს“, - განაცხადეს Spotify-ში. კომპანიაში დასძინეს, რომ მსმენელებს არ მოსწონთ, როდესაც პროფილი რეალურ ადამიანად აღიქმება, მოგვიანებით კი ირკვევა, რომ პერსონა ხელოვნური ინტელექტის მიერ არის შექმნილი.

Spotify განმარტავს, რომ აღნიშვნა ეხება შემსრულებლის საჯარო პერსონას და არა მისი მუსიკის შექმნის ხერხს. სერვისის გადაწყვეტილების გასაჩივრება შესაძლებელი იქნება.