თბილისის მერმა დედაქალაქის გუნდს ახალგაზრდულ ოლიმპიურ ფესტივალში გამარჯვება მიულოცა

თბილისის მერი კახა კალაძე ოლიმპიური კომიტეტის პრეზიდენტ ლერი ხაბელოვთან ერთად დედაქალაქის გუნდს შეხვდა, რომელმაც საქართველოს ახალგაზრდულ ოლიმპიურ ფესტივალში გაიმარჯვა.

გამარჯვებული ქალაქისთვის განკუთვნილი თასი ოლიმპიური კომიტეტისგან სიმბოლურად დედაქალაქის მერმა ჩაიბარა, მომავალში კი იგი თბილისის მერიის მრავალფუნქციურ საზოგადოებრივ ცენტრში განთავსდება.

დედაქალაქის მერმა გამარჯვებული გუნდის წევრებს სიტყვით მიმართა და მიღწეული წარმატება მიულოცა.

„ძალიან სასიამოვნოა, რომ ამდენი ახალგაზრდა მონაწილეობს სპორტულ შეჯიბრებში. ოლიმპიურ ფესტივალზე გამარჯვებული გახდა თბილისის გუნდი, რაც ძალიან სასიხარულოა. გულწრფელად მინდა, მოგილოცოთ ეს წარმატება, რადგან სპეციალური თასის მოპოვება თქვენი დამსახურებაა. ჩვენ ბოლო წლების განმავლობაში ბევრი მნიშვნელოოვანი პროექტი განვახორციელეთ იმისთვის, რომ ხელი შეგვეწყო სპორტის ყველა სახეობის განვითრებისთვის. დღეს ვიმყოფებით სამგორის მრავალფუნქციურ საზოგადოებრივ ცენტრში, რომელიც ერთ-ერთი მაგალითია იმისა, თუ როგორ ზრუნავს სახელმწიფო მომავალ თაობაზე. გარდა ამისა, გვაქვს პროგრამა, რომლითაც ხელს ვუწყობთ 60+ ადამიანებს, იცხოვრონ ჯანსაღი ცხოვრების წესით და ისარგებლონ ყველა იმ სპორტული ინფრასტრუქტურით, რომელიც მუნიციპალიტეტის საკუთრებაშია“, - განაცხადა კახა კალაძემ.

მისივე თქმით, სპორტის სხვადასხვა სახეობაში ბევრი ახალგაზრდაა ჩართული და მუნიციპალიტეტი მათ ხელშემწყობ პროექტებს მომავალშიც აქტიურად განახორციელებს.

„მიხარია, რომ სპორტის სხვადასხვა სახეობაში ბევრი ახალგაზრდაა ჩართული. ბევრი თქვენგანი ფიქრობს პროფესიონალურ სპორტზე. მინდა, ამ ყველაფერში წარმატებები გისურვოთ. ვიცი, როგორია სპორტსმენის გზა, რომელიც სავსეა გამოწვევებით, თუმცა ყველა გადალახული სირთულის დროს უფრო ვძლიერდებით. ასეა ყველაფერში. ამიტომ, არ შეუშინდეთ მათ. პირიქით, უფრო მეტი ენთუზიაზმით, ენერგიით, შრომისმოყვარეობით და, რაც მთავარია დისციპლინით, შეძლებთ, მიაღწიოთ დასახულ მიზნებს. კიდევ ერთხელ გილოცავთ ამ მნიშვნელოვან გამარჯვებას“, - აღნიშნა დედაქალაქის მერმა.