„ტედ ლასოს“ ვარსკვლავი პროფესიონალი ფეხბურთელი გახდა⚽

სერიალ „ტედ ლასოს“ ვარსკვლავმა, კრისტო ფერნანდესმა, ეკრანული ფეხბურთიდან მოედანზე გადაინაცვლა - მან ამერიკულ პროფესიონალურ კლუბთან კონტრაქტი გააფორმა.

ფერნანდესი აშშ-ის მეორე დივიზიონის (USL) გუნდს, „ელ პასო ლოკომოტივს“ შეუერთდა, სადაც ორთვიან გამოსაცდელ პერიოდს გაივლის.

კრისტომ პოპულარობა Apple TV-ს შოუში შესრულებული დანი როხასის როლით მოიპოვა. მისი პერსონაჟი, მექსიკელი ფორვარდი, მუდმივად იმეორებდა ფრაზას: „ფეხბურთი სიცოცხლეა!“. ბევრი სხვა მსახიობისგან განსხვავებით, ფერნანდესს რეალური საფეხბურთო წარსული აქვს: ის მექსიკაში გაიზარდა და ახალგაზრდობაში გვადალახარას კლუბ „ტეკოსში“ თამაშობდა, თუმცა 15 წლის ასაკში ტრავმების გამო სპორტისთვის თავის დანებება მოუწია.

სამსახიობო კარიერაში წარმატების შემდეგ, მას ფეხბურთისადმი სიყვარული კვლავ გაუღვივდა. მიმდინარე წლის დასაწყისში ის MLS-ის გუნდის, „ჩიკაგო ფაიერის“ სარეზერვო შემადგენლობასთან ერთადაც კი ვარჯიშობდა.

ახლა, 35 წლის ასაკში, ფერნანდესი ოფიციალურად დაუბრუნდა სპორტს. კლუბის ვებგვერდზე გამოქვეყნებულ განცხადებაში მან აღიარა, რომ პროფესიონალობაზე ოცნება არასდროს მიუტოვებია.

„ფეხბურთი ყოველთვის იყო ჩემი ცხოვრებისა და იდენტობის უდიდესი ნაწილი. სადაც არ უნდა წავეყვანე ცხოვრებას, პროფესიონალურ დონეზე ასპარეზობის ოცნება გულიდან არასდროს გამქრალა. მადლობელი ვარ ამ შესაძლებლობისთვის“, - განაცხადა ფერნანდესმა.