თელავში სტიქიის სალიკვიდაციო სამუშაოები აქტიურად გრძელდება

სტიქიიდან მეორე დღეს თელავში სალიკვიდაციო სამუშაოები აქტიურად გრძელდება. პრობლემურ მონაკვეთებზე მობილიზებულია მძიმე ტექნიკა. ქვა-ღორღისგან გაიწმინდა კავკასიონის ქუჩა, სადაც გადაადგილება აქამდე შეუძლებელი იყო. ადიდებული თელავის ხევი კალაპოტს დაუბრუნდა და ამ ეტაპზე მოსახლეობას საფრთხე აღარ ემუქრება.

წყალდიდობამ მნიშვნელოვანი ზიანი მიაყენა თელავს, განსაკუთრებით ინფრასტრუქტურის კუთხით. ზარალის ზუსტ ოდენობას სპეციალური კომისია დეტალურად აღწერს. სტიქიის მასშტაბების გათვალისწინებით, მალევე შეიქმნა საგანგებო შტაბიც, რომელიც სტიქიის გამომწვევ მიზეზებს ადგენს და პრევენციულ ღონისძიებებს გეგმავს.

„ოპერატიულად იყო მობილიზებული რამდენიმე ერთეული სპეცტექნიკა, რომელმაც გაწმენდითი სამუშაოები მყისიერად დაიწყო. კომპანია „ენერგოპრომ“ ძალიან ეფექტურად იმუშავა და ასევე „თელავგაზმა“ შესაბამისი სერვისის აღდგენის კუთხით“, - განაცხადა სახელმწიფო რწმუნებულმა კახეთის მხარეში პლატონ კალმახელიძემ.

„ინფრასტრუქტურა დაზიანდა საკმაოდ ძლიერად და მიმდინარეობს აღდგენითი, ასევე გაწმენდითი სამუშაობი. ყველას მადლობა მინდა ვუთხრა თანადგომისთვის“, - აღნიშნა თელავის მერმა, ვაჟა მაღრაძემ.