თენგიზ შარმანაშვილი კშიშტოფ ბრეიზას განცხადებაზე: კარგი, ვთქვათ ჩვენ გამოვიგონეთ სააკაშვილის მიმართ ბრალდებები, სტრასბურგმაც გამოიგონა?!

კარგი, ვთქვათ ჩვენ გამოვიგონეთ ეს ბრალდებები, სტრასბურგმაც გამოიგონა?! - განაცხადა პარლამენტის თავდაცვისა და უსაფრთხოების კომიტეტის თავმჯდომარის პირველმა მოადგილემ, თენგიზ შარმანაშვილმა.

ასე გამოეხმაურა დეპუტატი დამოუკიდებელ მედიაზე თავდამსხმელი პოლონელი დეპუტატის განცხადებას, რომელიც ამჯერად მიხეილ სააკაშვილს ეხება.

„საქმე არ გვაქვს რაიმე ადმინისტრაციულ გადაცდომასთან და ქცევის წესების დარღვევასთან ევროპარლამენტის შენობაში. მთავარი მოტივი ამ დევნისა, იყო პოლიტიკური. პოლიტიკურ დევნას ხელმძღვანელობდნენ და ხელს უწყობდნენ ის ევროდეპუტატები, რომლებიც ამას არც კი მალავენ და ხმამაღლა საუბრობენ ამ თემაზე. კარგი ვთქვათ ჩვენ გამოვიგონეთ ეს [სააკაშვილის მიმართ] ბრალდებები, სტრასბურგმაც გამოიგონა?! იმ პერიოდში, როდესაც ისინი [„ნაციონალური მოძრაობა“] მმართველობაში იყვნენ, ადამიანის უფლებათა დარღვევას ჰქონდა სისტემური და სისტემატური ხასიათი. მათ შორის გირგვლიანის საქმეში, [დამნაშავისთვის] ხელის დაფარების საკითხში სააკაშვილზეც უთითებენ ყოველგვარი მიკიბვ-მოკიბვის გარეშე“, - აღნიშნა შარმანაშვილმა.

პოლონელი დეპუტატი, ევროპარლამენტარი კშიშტოფ ბრეიზა, რომელმაც აღიარა, რომ ტელეკომპანია „იმედის“ წინააღმდეგ თვეებია მუშაობს, ამჯერად მიხეილ სააკაშვილის გათავისუფლებას ითხოვს.