The Independent: ბრიტანეთში ვადაზე ადრე გათავისუფლების პროგრამიდან მოძალადეებსა და არასრულწლოვანთა მიმართ მძიმე სექსუალური დანაშაულების ჩამდენ პირებს ამოიღებენ

გაერთიანებული სამეფოს ხელისუფლებამ განაცხადა, რომ პატიმართა ვადაზე ადრე გათავისუფლების განახლებული პროგრამით ვერ ისარგებლებენ გაუპატიურებისთვის, არასრულწლოვანთა მიმართ მძიმე სექსუალური დანაშაულების გამო მსჯავრდებული პირები. ინფორმაციას The Independent-ი ავრცელებს.

დიდი ბრიტანეთის პრემიერ-მინისტრმა ენდი ბერნემმა განაცხადა, რომ სრულად ესმის იმ „შეშფოთებისა და ტკივილის“, რომელიც ამ პროგრამამ საზოგადოებაში გამოიწვია. მისი თქმით, თავად უფრო მკაცრი შეზღუდვების დაწესებასაც ემხრობოდა, თუმცა ასეთ შემთხვევაში სასჯელაღსრულების სისტემა გადატვირთვისა და ფაქტობრივი კოლაფსის წინაშე დადგებოდა.

პრემიერმა ასევე აღნიშნა, რომ ვადამდე გათავისუფლებულ მსჯავრდებულებზე ზედამხედველობა მნიშვნელოვნად გამკაცრდება. მათ შორის, გაუპატიურებისთვის გასამართლებულ პირებზე დაწესდება GPS-ით მონიტორინგი, რაც სამართალდამცველებს მათი გადაადგილების შეზღუდვის საშუალებას მისცემს.

როგორც გამოცემა იუწყება, თავდაპირველად ხელისუფლება პატიმრების ნაწილის სექტემბერში ვადამდე გათავისუფლებას გეგმავდა, რათა გადატვირთულ ციხეებში მდგომარეობა შეემსუბუქებინა. თუმცა საზოგადოების, მათ შორის სექსუალური ძალადობის მსხვერპლთა მწვავე კრიტიკის შემდეგ, გეგმა გადაიხედა და მისი ამოქმედება ოქტომბრამდე გადაიდო.

მოკლული პოლიციელის ენდრიუ ჰარპერის ქვრივმა ლისი ჰარპერმა განაცხადა, რომ ხელისუფლების გადაწყვეტილებით „უკიდურესად აღშფოთებულია“. თემზ ველის პოლიციის უფროსმა ჯეისონ ჰოგმა კი აღნიშნა, რომ ზოგიერთი კატეგორიის დამნაშავის პროგრამიდან სრულად არ გამორიცხვა „ყველა პოლიციელისთვის დემორალიზების გამომწვევია“.

გავრცელებულ განცხადებაში ბერნემმა აღნიშნა: „საზოგადოების უსაფრთხოება ჩემი უმთავრესი პრიორიტეტია. სწორედ ამიტომ მოვითხოვე პატიმართა ვადამდე გათავისუფლების სქემის სასწრაფო გადახედვა. სრულად მესმის საზოგადოების აღშფოთების, შფოთვისა და ტკივილის. ეს მკაფიოდ მოვისმინე. სწორედ ამიტომ ვახორციელებთ მნიშვნელოვან ცვლილებებს: გაუპატიურებისთვის, არასრულწლოვანთა მიმართ მძიმე სექსუალური დანაშაულების ჩამდენები ამ სქემით ვერ ისარგებლებენ“.

მისივე თქმით, მას სურდა შეზღუდვები სხვა კატეგორიის დამნაშავეებზეც გავრცელებულიყო, თუმცა ეს სასჯელაღსრულების სისტემას კოლაფსამდე მიიყვანდა და საზოგადოებრივ უსაფრთხოებას კიდევ უფრო დიდ საფრთხეს შეუქმნიდა.

პრემიერი ასევე გეგმავს საზოგადოებაში სასჯელის მოხდის პირობების გამკაცრებას. მისი განცხადებით, თითქმის ყველა ასეთი მსჯავრდებული ელექტრონულ სამაჯურს ატარებს, გაიზრდება ზედამხედველობის ვადები და დაწესდება სპეციალური ზონები, სადაც მათ გადაადგილება შეეზღუდებათ.

სასჯელის შესახებ კანონში დაგეგმილი ცვლილებების მიხედვით, დაახლოებით 6 000 პატიმარი სექტემბერში ციხეს სასჯელის ერთი მესამედის მოხდის შემდეგ დატოვებდა, ნაცვლად მოქმედი წესისა, რომელიც სასჯელის ნახევრის მოხდას ითვალისწინებს. ცვლილებების მიზანი საპატიმროების გადატვირთულობის შემცირება იყო.

ოთხი წლის ან მეტი ვადით მსჯავრდებული პირები გათავისუფლების უფლებას სასჯელის ნახევრის მოხდის შემდეგ მიიღებდნენ, მაშინ როდესაც აქამდე ამისთვის სასჯელის ორი მესამედის მოხდა იყო საჭირო.

ცვლილებების ეტაპობრივად ამოქმედება იგეგმებოდა - თავდაპირველად ისინი 575 დღეზე ნაკლები ვადით მსჯავრდებულებზე გავრცელდებოდა, ხოლო 12 წლით ან მეტი ვადით თავისუფლება აღკვეთილ პირებზე მომავალი წლის ივნისიდან.

ხელისუფლებამ განაცხადა, რომ დაზარალებულთა პოზიციის გათვალისწინებით, გაუპატიურებისთვისა და არასრულწლოვანთა მიმართ სექსუალური დანაშაულებისთვის მსჯავრდებულები ამ ცვლილებების ფარგლებს გარეთ დარჩებიან.

ისინი შეუერთდებიან იმ 18 000 მსჯავრდებულს, რომლებიც უკვე ამოღებულნი არიან ვადამდე გათავისუფლების სქემიდან, მათ შორის სასამართლოს მიერ განსაკუთრებით საშიშ დამნაშავეებად მიჩნეული პირები და უვადო პატიმრობა მისჯილი პირები.