The Telegraph: ნატოს ხუთმა ქვეყანამ უკრაინისთვის დამატებითი სამხედრო დახმარების გეგმა დაბლოკა

დიდმა ბრიტანეთმა, საფრანგეთმა, ესპანეთმა, იტალიამ და კანადამ დაბლოკეს ნატოს გენერალური მდივნის მარკ რუტეს ინიციატივა, რომელიც ალიანსის წევრი ქვეყნების მიერ უკრაინის სამხედრო დახმარებისთვის საკუთარი მშპ-ს 0,25%-ის გამოყოფას ითვალისწინებდა.

ინფორმაციას The Telegraph-ი, ნატო-ში არსებულ წყაროებზე დაყრდნობით ავრცელებს.

ჟურნალისტების ინფორმაციით, ნატოს მინიმუმ შვიდმა ქვეყანამ, რომლებიც უკრაინისთვის საკუთარი მშპ-ს 0,25%-ზე მეტს უკვე ხარჯავენ, ამ იდეას მხარი დაუჭირა. მათ შორის არიან ნიდერლანდები, პოლონეთი, ასევე, ბალტიისა და სკანდინავიის ქვეყნები. თუმცა, ალიანსში გადაწყვეტილებები კონსენსუსის საფუძველზე მიიღება, ხოლო ლონდონი, პარიზი, მადრიდი, რომი და ოტავა ამის წინააღმდეგ წავიდნენ. ალიანსში არსებული წყაროს თქმით, ეს ქვეყნები „ამ იდეით აღფრთოვანებულნი არ არიან“.

რუტემ აღიარა, რომ მისი ინიციატივა მოკავშირეების მხრიდან ერთსულოვანი მხარდაჭერის არარსებობის გამო ვერ განხორციელდება და იმედოვნებდა, რომ ამ გეგმას ალიანსის მომავალ, ანკარის სამიტზე დაამტკიცებდა.

ამასთან, რუტე ამტკიცებს, რომ უკრაინისთვის გაწეული დახმარება „ნატო-ს ფარგლებში არათანაბრად არის გადანაწილებული“ და რომ ბევრი ქვეყანა „არასაკმარისად ხარჯავს, როდესაც საქმე უკრაინის მხარდაჭერას ეხება“. ნატო-ს ხელმძღვანელი დიდი ხანია ხაზგასმით აღნიშნავს, რომ ევროპამ მეტი პასუხისმგებლობა უნდა აიღოს უკრაინის მხარდაჭერაზე და მხოლოდ აშშ-ის დახმარებას არ დაეყრდნოს.