The Telegraph: ნავთობის ფასები ირანთან ომის დაწყებამდე არსებულ დონემდე დაეცა

გამოცემა The Telegraph-ის ინფორმაციით, მას შემდეგ, რაც ტანკერებმა ჰორმუზის სრუტეში გადაადგილება განაახლეს, ნავთობის მსოფლიო ფასები იმ ნიშნულამდე შემცირდა, რომელიც ირანთან ომის დაწყებამდე იყო.

გამოცემის ცნობით, Brent-ის ტიპის ნავთობი 1,7%-ით გაიაფდა და ბარელზე 72.52 დოლარამდე ჩამოვიდა. ეს მაჩვენებელი ომის დაწყებამდე ერთი დღით ადრე, 27 თებერვალს დაფიქსირებულ ფასზე დაბალია.

აშშ-ში წარმოებული West Texas Intermediate-ის ფასი კი 1.3%-ზე მეტით შემცირდა და ბარელზე 69.41 დოლარი შეადგინა.

ფასების კლება გლობალური ბაზრების საერთო ზრდის ფონზე მოხდა - აზიური საფონდო ბირჟები ღამით მნიშვნელოვნად გაიზარდა მას შემდეგ, რაც ამერიკულმა ჩიპების გიგანტმა Micron-მა ძლიერი ფინანსური შედეგები და პროგნოზები გამოაქვეყნა.

როგორც The Telegraph-ი იუწყება, აპრილში ნავთობის ფასი 126 დოლარამდე გაიზარდა მას შემდეგ, რაც კონფლიქტის გამო ირანმა ჰორმუზის სრუტე სრულად ჩაკეტა.

სხვადასხვა მონაცემების მიხედვით, ნავთობის ტანკერები კვლავ გადიან სრუტეში, რაც გლობალურ მიწოდებაზე წნეხს ამცირებს. ამასთან, აშშ-სა და ირანს შორის შვეიცარიაში მიმდინარე სამშვიდობო მოლაპარაკებებმა ბაზარზე დამატებითი სტაბილურობის განცდა შექმნა.