The Wall Street Journal: აშშ ირანს მისცემს უფლებას, ომის დასრულების შესახებ შეთანხმების ფარგლებში, დაუყოვნებლივ დაიწყოს ნავთობისა და საწვავის გაყიდვა

აშშ ირანს მისცემს უფლებას, ომის დასრულების შესახებ შეთანხმების ფარგლებში, დაუყოვნებლივ დაიწყოს ნავთობისა და საწვავის გაყიდვა. ეს თეირანისთვის იქნება ადრეული ფინანსური სტიმული კონფლიქტის დასასრულებლად. ინფორმაციას ამის შესახებ ამერიკული გამოცემა The Wall Street Journal-ი ინფორმირებულ წყაროებზე დაყრდნობით ავრცელებს.

სანქციების გაუქმების დებულება, რომელიც ნავთობის გაყიდვას ეხება, ძალაში შედის მიმდინარე კვირას შეთანხმების ხელმოწერისთანავე და ასევე მოიცავს იმ აუცილებელ მომსახურებებს - მათ შორის საბანკო, სატრანსპორტო და დაზღვევის სფეროებს - რაც საჭიროა ამ გაყიდვების ხელშესაწყობად, აცხადებენ წყაროები.

არაკომერციულმა ორგანიზაციამ „გაერთიანებული ბირთვული ირანის წინააღმდეგ“ (United Against Nuclear Iran) განაცხადა, რომ ირანულმა სუპერტანკერმა, რომელსაც ნედლი ნავთობი გადააქვს, ჩაბაჰარის პორტი დატოვა და სამშაბათს ომანის ყურედან გავიდა ჩართული ადგილმდებარეობის ტრეკერით. ეს პირველი შემთხვევაა აპრილში აშშ-ის მიერ ბლოკადის დაწყების შემდეგ.

აშშ-ის მაღალჩინოსანმა სამშაბათს განაცხადა, რომ მიუხედავად იმისა, რომ ირანი ნავთობის გაყიდვებზე სანქციების შემსუბუქებას წინასწარ მიიღებს, ამ შეღავათების შენარჩუნება დამოკიდებული იქნება იმაზე, თუ როგორ შეასრულებს თეირანი ამერიკის მოთხოვნებს ისეთ საკითხებთან დაკავშირებით, როგორიცაა ჰორმუზის სრუტის გახსნა და მისი ბირთვული პროგრამა. ირანი კვლავ ვერ მიიღებს დაუყოვნებლივ წვდომას გაყინულ მილიარდობით დოლარზე.