The Wall Street Journal: ცენტრალური სადაზვერვო სააგენტოს დირექტორის მოულოდნელი ვიზიტი მოსკოვში მიზნად ისახავდა რუსეთის გაფრთხილებას, არ დაესხას თავს ნატოს წევრ ქვეყნებს

ცენტრალური სადაზვერვო სააგენტოს დირექტორის მოულოდნელი ვიზიტი მოსკოვში მიზნად ისახავდა რუსეთის გაფრთხილებას, არ დაესხას თავს ნატოს წევრ ქვეყნებს. ინფორმაციას ამის შესახებ ამერიკული გამოცემა The Wall Street Journal-ი ინფორმირებულ წყაროებზე დაყრდნობით ავრცელებს.

ეს ვიზიტი დაზვერვის სააგენტოს ხელმძღვანელის, ჯონ რეტკლიფის პირველი საჯაროდ ცნობილი ვიზიტი იყო რუსეთის დედაქალაქში. მას წინ უძღოდა აშშ-ის დაზვერვის ახალი შეფასებები - რის შესახებაც თავდაპირველად The Wall Street Journal-ი იტყობინებოდა - რომლის თანახმადაც, შესაძლოა რუსეთის პრეზიდენტმა, ვლადიმირ პუტინმა უახლოეს წლებში ჩრდილოატლანტიკური ალიანსის მტკიცე პოზიციის გამოცდა მოკავშირე ქვეყანაზე შეზღუდული თავდასხმით სცადოს.

აშშ-ის ოფიციალური პირები შეშფოთებულნი არიან იმით, რომ უკრაინაში შევიწროებულმა და ქვეყნის შიგნით ზეწოლის ქვეშ მყოფმა პუტინმა შესაძლოა წამოიწყოს თავდასხმა - კიბერშეტევიდან დაწყებული, მცირე მასშტაბის სახმელეთო შეჭრით დამთავრებული, სავარაუდოდ, ბალტიისპირეთის რომელიმე ქვეყანაზე.

დასავლური კრიტიკული საბრძოლო მასალის დეფიციტმა, რაც ირანის ომში გაწეულმა ხარჯებმა განაპირობა, შესაძლოა პუტინის გათვლებზეც მოახდინოს გავლენა.

აშშ-მა გარკვეული შეიარაღების მარაგები როგორც 2022 წელს რუსეთის შეჭრის შემდეგ უკრაინისთვის გადაცემული დახმარების, ისე ირანის კონფლიქტის გამო შეამცირა.