თორნიკე ჭეიშვილი: ეს კიდევ ერთი კომიკური ეპიზოდი იყო ამ რადიკალების შეკრებისა, როცა ისინი ცდილობდნენ, რომ დასდევნებოდნენ მარკო რუბიოს თვითმფრინავს და სადღაც ზეცაში ეძებდნენ მას, როდესაც უკვე რამდენიმე საათის დატოვებული ჰქონდა ჩვენი რეგიონი

ეს კიდევ ერთი კომიკური ეპიზოდი იყო ამ რადიკალების შეკრებისა, როცა ისინი ცდილობდნენ, რომ დასდევნებოდნენ მარკო რუბიოს თვითმფრინავს და სადღაც ზეცაში ეძებდნენ მას, როდესაც უკვე რამდენიმე საათის დატოვებული ჰქონდა ჩვენი რეგიონი, - განაცხადა გადაცემაში „დღის ქრონიკა“ იურიდიულ საკითხთა კომიტეტის თავმჯდომარის პირველმა მოადგილემ თორნიკე ჭეიშვილმა მარკო რუბიოს ერევანში ვიზიტზე და ოპოზიციის რეაქციაზე საუბრისას.

ჭეიშვილმა ისაუბრა აშშ-ის პრეზიდენტის, დონალდ ტრამპის მისალოც წერილზეც, რომელიც მან საქართველოს დამოუკიდებლობის დღეს გამოუგზავნა.

„გადმოცემული ნარატივი და ის გზავნილები, რომელიც ამ მისალოც ტექსტში ჩვენ ვიხილეთ, თავისთავად არის ლოგიკური გაგრძელება იმ რამდენიმე თვიანი კომუნიკაციისა, რომელიც ახლა ძალიან აქტიურ ფაზაშია. შედგა რამდენიმე ორმხრივი ვიზიტი, როგორც საქართველოს ხელისუფლების წარმომადგენლებისა შეერთებულ შტატებში, ასევე სხვა რამდენიმე სახელმწიფოში არსებობდა კომუნიკაციის შესაძლებლობა. შეერთებული შტატებიდან ახლაც იმყოფებიან საქართველოში სტუმრები, ასევე აღსანიშნავია აშშ-ის სახელმწიფო მდივანთან პრემიერის კომუნიკაცია.

ეს ყველაფერი ჩვენ გვაძლევს პოზიტიურ მოლოდინს, გარკვეულ იმპულსს იმისა, რომ მოხერხდება სტრატეგიული პარტნიორობის სუფთა ფურცლიდან დაწყება და ეს იქნება იმგვარი პარტნიორობა, რომელშიც გათვალისწინებული იქნება ორივე მხარის ინტერესები, ახლა სწორედ ის ეტაპია, როდესაც ხდება გარკვეული კონტურების შემოფარგვლა, თუ რა არის ის საკითხები სადაც შეიძლება რომ არსებობდეს ინტერესთა კვეთა, რაც სამომავლოდ გადაიზრდება კონკრეტულ ნაბიჯებსა და ქმედებებში“, - აღნიშნა თორნიკე ჭეიშვილმა.

იურიდიულ საკითხთა კომიტეტის თავმჯდომარის პირველმა მოადგილემ ასევე თქვა, რომ მმართველი გუნდი საქართველო-ამერიკის ურთიერთობას ოპტიმისტურად უყურებს.