ტრამპი: ირანს არ შეიძლება ჰქონდეს ბირთვული იარაღი და არც ექნება - ისინი ამას დათანხმდნენ, სხვა საკითხებთან ერთად

აშშ-ის პრეზიდენტმა, დონალდ ტრამპმა განაცხადა, რომ აშშ-ს ბოლო 24 საათის განმავლობაში ირანთან „ძალიან კარგი მოლაპარაკებები“ ჰქონდა, თუმცა აღნიშნა, რომ „არავითარი ვადები არ არსებობს“ იმასთან დაკავშირებით, თუ როდის ელოდება თეირანისგან პასუხს ომის დასრულების შესახებ აშშ-ის წინადადებაზე.

„კარგ მდგომარეობაში ვართ“, - განუცხადა ტრამპმა ჟურნალისტებს ოთხშაბათს ოვალურ კაბინეტში. „ახლა ყველაფერი კარგად მიდის და ჩვენ უნდა მივიღოთ ის, რაც მისაღებია. თუ ამას ვერ მივაღწევთ, მოგვიწევს უფრო დიდი ნაბიჯის გადადგმა. თუმცა, ამის მიუხედავად, მათ შეთანხმების მიღწევა სურთ“.

„ძალიან შესაძლებელია, რომ გარიგება შედგეს“, - დასძინა მან.

კითხვაზე, არსებობს თუ არა კონკრეტული ვადა აშშ-ის ბოლო წინადადებაზე ირანისგან პასუხის მისაღებად, ტრამპმა მიანიშნა, რომ დროში შეზღუდულები არ არიან. „ვადები არასოდეს არსებობს; ეს მოხდება. ეს მოხდება, მაგრამ ყოველგვარი ვადების გარეშე“, - თქვა მან.

ტრამპმა ასევე განაცხადა, რომ ირანი დათანხმდა მის მთავარ მოთხოვნას - არ ჰქონდეს ბირთვული იარაღი.

„ირანს არ შეიძლება ჰქონდეს ბირთვული იარაღი და არც ექნება; ისინი ამას დათანხმდნენ, სხვა საკითხებთან ერთად“, - განაცხადა პრეზიდენტმა.