ტრამპის ადმინისტრაციამ გამოაცხადა 1.8 მილიარდი დოლარის ოდენობის ფონდის შექმნის შესახებ, რომლის მიზანიც იმ პირთათვის ზარალის ანაზღაურებაა, ვინც აცხადებს, რომ ბაიდენის იუსტიციის დეპარტამენტისა და „დემოკრატების“ სამიზნე გახდა

ტრამპის ადმინისტრაციამ გამოაცხადა 1.8 მილიარდი დოლარის ოდენობის ფონდის შექმნის შესახებ, რომლის მიზანიც იმ პირთათვის ზარალის ანაზღაურებაა, ვინც აცხადებს, რომ ბაიდენის იუსტიციის დეპარტამენტისა და „დემოკრატების“ სამიზნე გახდა, - წერს ამერიკული გამოცემა The New York Times-ი.

„ამით შეიქმნა არხი გადასახადების გადამხდელთა ფულადი სახსრების პრეზიდენტ ტრამპის მოკავშირეებისკენ მიმართვისთვის“, - აღნიშნავს The New York Times-ი.

„ეს უკიდურესად არაორდინალური ფონდი, რომელსაც კრიტიკოსები პოლიტიკურ „შავ სალაროდ“ ნათლავენ, მას შემდეგ გასაჯაროვდა, რაც ტრამპმა გამოიტანა თავისი სარჩელი შიდა შემოსავლების სამსახურის წინააღმდეგ, რომლითაც, სულ მცირე, 10 მილიარდ დოლარს ითხოვდა. ეს იყო აშკარა მცდელობა, თავი აერიდებინათ საქმის მოსამართლის მხრიდან ზედამხედველობისთვის, რომელმაც მანამდე შეშფოთება გამოთქვა იმის გამო, რომ აღნიშნული სარჩელი წარმოადგენდა პირადი ინტერესების გატარებას პრეზიდენტსა და იმ უწყებას შორის, რომელსაც მისი ყოფილი ადვოკატი, ტოდ ბლანში ხელმძღვანელობს“, - ნათქვამია სტატიაში.

ფონდის ფულადი მოცულობა 1.776 მილიარდ დოლარად განისაზღვრა. იუსტიციის დეპარტამენტმა თავის განცხადებაში დასძინა, რომ ფონდის შექმნა მიზნად ისახავს „სისტემური პროცესის უზრუნველყოფას იმ სხვა პირთა პრეტენზიების მოსასმენად და დასაკმაყოფილებლად, რომლებიც სამართლებრივი სისტემის ბოროტად გამოყენებისა და პოლიტიკურად მოტივირებული სამართლებრივი დევნის მსხვერპლნი გახდნენ“, თუმცა უწყებას სხვა დეტალები, მათ შორის იმის შესახებ, თუ ვინ შეიძლება აკმაყოფილებდეს ამ კრიტერიუმებს, თითქმის არ დაუკონკრეტებია.

ტრამპმა და დეპარტამენტის ხელმძღვანელობამ არაერთხელ დაადანაშაულეს „დემოკრატები“ ფედერალური სამართალდამცავი ორგანოების თავიანთი მტრების წინააღმდეგ ბოროტად გამოყენებაში.

ფონდისთვის განკუთვნილი თანხები გამოიყოფა იუსტიციის დეპარტამენტის განკარგულებაში არსებული სპეციალური, შეუზღუდავი ანგარიშიდან, რომელიც სასამართლო დავების მოსაგვარებლად გამოიყენება.