წილოსანი დანიის მოვლენებზე პრემიერის ღია წერილზე: ეს იმ ტაქტიკის გამოყენებაა ჩვენი მხრიდან, რომელსაც ჩვენი პარტნიორები არასწორად იყენებდნენ საქართველოსთან მიმართებით. თუმცა, ამ შემთხვევაში ჩვენ ობიექტურად გამოვხატეთ აღშფოთება

საქართველოს პარლამენტის ვიცე სპიკერი ნინო წილოსანი საქართველოს პრემიერ-მინისტრის ღია წერილს აფასებს, რომლითაც ირაკლი კობახიძემ დანიაში დემონსტრანტების წინააღმდეგ პოლიციის მიერ ძალის გამოყენებასთან დაკავშირებით ევროკავშირის ხელმძღვანელ პირებს მიმართა.

„საქართველო არის იმ დასავლური სამყაროს ნაწილი, სადაც მიუღებელია ისეთი უხეში ფორმებით დემონსტრანტების დარბევა, რომელიც ჩვენ ვნახეთ დანიაში. შესაბამისად, პრემიერ-მინისტრის ღია წერილი სწორედ იმ ტაქტიკის გამოყენებაა ჩვენი მხრიდან, რომელსაც სამწუხაროდ, ჩვენი მეგობრები და პარტნიორები არასწორად იყენებდნენ საქართველოსთან მიმართებით. თუმცა, ამ შემთხვევაში ჩვენ სრულიად ობიექტურად გამოვხატეთ აღშფოთება. რა თქმა უნდა, მაშინ, როდესაც ორმაგი სტანდარტი აქვთ დამკვიდრებული საქართველოსთან მიმართებით დემონსტრაციები პოლიციის მხრიდან საკმაოდ მაღალ დონეზე მართული ყველაზე დიდი კრიტიკით დაგმობილი იყო, ვფიქრობ, ეს მინიმუმია, რაც შეგვეძლო, გაგვეკეთებინა, როდესაც ვხედავთ, როგორი ბრუტალური ფორმით ეპყრობოდნენ დანიაში პოლიციელები დემონსტრანტებს”, - განაცხადა ნინო წილოსანმა.

საქართველოს პრემიერ-მინისტრი ურსულა ფონ დერ ლაიენს, ანტონიო კოშტასა და რობერტა მეცოლას ღია წერილით მიმართავს.