უკრაინელებმა Patriot-ის ტიპის რაკეტების დეფიციტის გამო ღამე ვერცერთი რუსული ბალისტიკური რაკეტა ვერ მოიგერიეს

უკრაინის საჰაერო ძალებში განაცხადეს, რომ 6 ივლისს, კიევზე თავდასხმის დროს, საჰაერო თავდაცვის სისტემებმა ვერცერთი ბალისტიკური რაკეტა ვერ მოიგერიეს. უკრაინის საჰაერო ძალების სპიკერის, იური იგნატის თქმით, ამის მიზეზი კომპლექს Patriot-ის საზენიტო რაკეტების მწვავე დეფიციტი გახდა.

უკრაინული მხარის მონაცემებით, რუსეთმა მასირებული დარტყმისას 419 საჰაერო თავდასხმის საშუალება გამოიყენა - სხვადასხვა ტიპის 68 რაკეტა და 351 დრონი. მთავარი სამიზნე კიევი და კიევის ოლქი გახდა.

უკრაინის საჰაერო თავდაცვის ძალებმა შეძლეს 31 ერთეული Х-101 ტიპის ფრთოსანი რაკეტის, ექვსი „კალიბრისა“ და დრონების მნიშვნელოვანი ნაწილის ჩამოგდება. თუმცა, ამავდროულად, დაფიქსირდა ბალისტიკური რაკეტების, ასევე ხომალდსაწინააღმდეგო რაკეტებისა და დრონების ნაწილის მიზანში მოხვედრა.

იგნატმა აღნიშნა, რომ სწორედ Patriot-ის სისტემებისთვის განკუთვნილი საბრძოლო მასალის ნაკლებობა გახდა ბალისტიკური რაკეტების წინააღმდეგ დაბალი ეფექტურობის მთავარი მიზეზი. მან ხაზგასმით აღნიშნა, რომ ასეთი რაკეტების ჩაჭრა უფრო რთულია, ხოლო რუსული მხარე, მისი თქმით, სულ უფრო ხშირად ფსონს სწორედ მათზე დებს და უკრაინის საჰაერო თავდაცვის შეზღუდული მარაგებით სარგებლობს

დარტყმის წინა დღეს უკრაინის პრეზიდენტი ვოლოდიმირ ზელენსკი მასირებული თავდასხმის მაღალი ალბათობის შესახებ აფრთხილებდა და დასავლელ პარტნიორებს Patriot-ის სისტემებისა და მათთვის განკუთვნილი საბრძოლო მასალის მიწოდების დაჩქარებისკენ მოუწოდებდა. თავდასხმის შემდეგ ზელენსკიმ კვლავ მიმართა მოკავშირეებს და მოუწოდა მიიღონ „მტკიცე გადაწყვეტილებები“ ანკარაში ნატოს მოახლოებულ სამიტზე.

ბოლო მონაცემებით, კიევზე ღამის თავდასხმის შედეგად სულ მცირე 11 ადამიანი დაიღუპა. 7 ივლისი ქალაქში გლოვის დღედ გამოცხადდა.