უკრაინის რადამ ეროვნული პანთეონის შექმნის შესახებ კანონი მიიღო. პანთეონში, შესაძლოა, გადაასვენონ სტეპან ბანდერა, რომელსაც პოლონელები ვოლინის ტრაგედიასთან აკავშირებენ, შესაბამისად, მისი განდიდება მიუღებლად მიაჩნიათ

უკრაინის უმაღლესმა რადამ ხმათა უმრავლესობით ქვეყნის ეროვნული პანთეონის შექმნის შესახებ კანონი მიიღო. ინფორმაციას უკრაინული მედია ავრცელებს.

კანონპროექტის ინიციატორი უკრაინის პრეზიდენტი ვოლოდიმირ ზელენსკი იყო. ინიციატივის თანახმად, კიევში შეიქმნება ერთიანი სივრცე, სადაც სტუმრებს უკრაინის სახელმწიფოებრიობის უწყვეტობის შესახებ მოუყვებიან.

პანთეონში იქნება აგრეთვე სახელმწიფო მემორიალური კომპლექსი, სადაც დაკრძალავენ გამოჩენილ უკრაინელ მოღვაწეებს, პრეზიდენტებისა და ქვეყნის დამოუკიდებლობისთვის მებრძოლების ჩათვლით.

მედიაში ვრცელდება ინფორმაცია, რომ ახალ მემორიალში, შესაძლოა, გადაასვენონ სიმონ პეტლიურას და სტეპან ბანდერას ნეშტებიც. აღსანიშნავია, რომ ბანდერას ფიგურას პოლონეთში ნეგატიურად აფასებენ. პოლონელები ამტკიცებენ, რომ ბანდერა ვოლინის ტრაგედიასთან არის კავშირში, შესაბამისად, მისი განდიდება მიუღებელია.