უკრაინული მედია: ბულგარეთმა განაცხადა, რომ მხარს არ დაუჭერს რუსეთის წინააღმდეგ ევროკავშირის სანქციების ახალ, 21-ე პაკეტს, მასში რუსეთის მართლმადიდებელი ეკლესიის მეთაურის, პატრიარქ კირილეს შეყვანის გამო

ბულგარეთმა განაცხადა, რომ მხარს არ დაუჭერს რუსეთის წინააღმდეგ ევროკავშირის სანქციების ახალ, 21-ე პაკეტს, მასში რუსეთის მართლმადიდებელი ეკლესიის მეთაურის, პატრიარქ კირილეს შეყვანის გამო. ინფორმაციას ამის შესახებ უკრაინული გამოცემა „ევროპეისკა პრავდა“ ევროკავშირის ორ დიპლომატზე დაყრდნობით ავრცელებს.

რუსეთის წინააღმდეგ სანქციების 21-ე პაკეტი ევროკავშირის ელჩებმა გასულ კვირას განიხილეს. სწორედ მაშინ გამოხატა ბულგარეთმა უთანხმოება სასანქციო სიაში რუსეთის პატრიარქის დამატებასთან დაკავშირებით, რადგან იგი ამაში რელიგიურ საქმეებში ჩარევას ხედავს.

ასევე, „ევროპეისკა პრავდას“ თანამოსაუბრეთა ცნობით, რამდენიმე სახელმწიფომ, მათ შორის ბულგარეთმა, ენერგეტიკის სფეროში შეთავაზებულ სანქციებთან დაკავშირებით გარკვეული შეშფოთება გამოხატა - 21-ე პაკეტი ითვალისწინებს რუსულ ნავთობზე ფასის ზედა ზღვრის გაყინვას, მისი შემდგომი ზრდის თავიდან ასაცილებლად.

ევროკავშირის მუდმივ წარმომადგენელთა კომიტეტი (COREPER) მომდევნო სხდომაზე ოთხშაბათს შეიკრიბება, სადაც გააგრძელებს ევროკომისიის მიერ შეთავაზებული, რუსეთის წინააღმდეგ ევროკავშირის სანქციების 21-ე პაკეტის პროექტის განხილვას.