უკრაინული მედია: უკრაინამ ვოლგოგრადში რუსული სამხედრო ობიექტი დაბომბა

უკრაინის შეიარაღებულმა ძალებმა სარაკეტო იერიში მიიტანა რუსეთის ქალაქ ვოლგოგრადში მდებარე სამხედრო ობიექტზე. ინფორმაციას უკრაინული მედია ავრცელებს.

ადგილობრივების ცნობით, ქალაქში ღამით აფეთქებების ხმა გაისმა და ხანძარი გაჩნდა, რის შემდეგაც ვოლგოგრადის ოლქში სარაკეტო განგაში გამოცხადდა. სოციალურ ქსელებში გავრცელებულ ვიდეოებში ქალაქის თავზე კვამლი ჩანს.

წინასწარი ინფორმაციით, უკრაინელებმა დაბომბეს „ტიტან-ბარიკადის“ სამხედრო ქარხანა, რომელიც სტრატეგიული სარაკეტო სისტემებისთვის გამშვებ დანადგარებს აწარმოებს.

დარტყმა განხორციელდა უკრაინული წარმოების შორი მანძილზე მოქმედი „ფლამინგოს“ ტიპის ფრთოსანი რაკეტებით, წერს უკრაინული მედია.

ვოლგოგრადის ოლქის გუბერნატორმა ანდრეი ბოჩაროვმა მოგვიანებით დაადასტურა, რომ ქალაქი ღამით უკრაინელების მიერ დაიბომბა, რის შედეგადაც კრასნოოქტიაბრსკის რაიონში ერთ-ერთი საწარმოს წარმოების ობიექტები დაზიანდა.

ბოჩაროვის განცხადებით, დაშავდა 10 ადამიანი, რომლებიც სამედიცინო დახმარებას იღებენ. მისივე თქმით, ხანძრები მალევე ჩააქრეს და საცხოვრებელი სახლები არ დაზიანებულა.