უმაღლესი საბჭოში მთავრობის თავმჯდომარის ანგარიში მოისმინეს
აჭარის უმაღლესი საბჭოს რიგგარეშე პლენარულ სხდომაზე, რომელსაც საკანონმდებლო ორგანოს თავმჯდომარე - ცოტნე ანანიძე უძღვებოდა, ავტონომიური რესპუბლიკის მთავრობის თავმჯდომარის ანგარიში მოისმინეს - ზურაბ პატარაძე დეპუტატების წინაშე გაწეული საქმიანობის, პრიორიტეტებისა და სამომავლო გეგმების შესახებ ინფორმაციით წარდგა.
მთავრობის მეთაურმა თავის გამოსვლაში გასული 2025 წელი და მიმდინარე წლის პირველი კვარტალი შეაჯამა. მომხსენებლის განცხადებით, ბოლო წლებში სტაბილურობისა და უწყვეტი მშვიდობის პირობებში, სწორად დაგეგმილმა ეკონომიკურმა პოლიტიკამ რეგიონს სწრაფი განვითარება მოუტანა. აღინიშნა, რომ უპრეცედენტოდ გაზრდილი რესპუბლიკური ბიუჯეტი იძლევა იმის შესაძლებლობას, რომ კიდევ უფრო მეტი, მოსახლეობის საჭიროებებზე მორგებული პროექტი განხორციელდეს. მოხსენებისას ზურაბ პატარაძემ განსაკუთრებული აქცენტი გააკეთა მსხვილ ინფრასტრუქტურულ პროექტებზე, მნიშვნელოვან სარეაბილიტაციო სამუშაოებზე, საინვესტიციო გარემოსა და ტურიზმის ხელშეწყობაზე. მისი თქმით, ახალი სამუშაო ადგილების შექმნა და მოქალაქეების შემოსავლების ზრდა მთავრობის უმთავრესი პრიორიტეტია. ყურადღება გამახვილდა ჯანმრთელობისა და სოციალური დაცვის, განათლების, კულტურის, სპორტისა და სოფლის მეურნეობის მიმართულებით მიმდინარე და დაგეგმილ ინიციატივებზე.
სხდომაზე, რომელსაც აჭარის მთავრობის წევრები ესწრებოდნენ, ზურაბ პატარაძემ უპასუხა კანონმდებელთა კითხვებს და მოისმინა მათი მოსაზრებები.
ინფორმაციას აჭარის უმაღლესი საბჭო ავრცელებს.
იმედი
წყარო: imedinews.ge