ვახტანგ ცინცაძე: ჩენდლერის ინსტიტუტის რეიტინგში ხაზგასმულია ქვეყნის მიმზიდველი ბიზნესგარემო და საინვესტიციო გარემოს გაუმჯობესების კუთხით გადადგმული ნაბიჯები

ჩენდლერის ინსტიტუტის „კარგი მთავრობის ინდექსი 2026“- ში საქართველომ გლობალურად, 133 ქვეყანას შორის 43-ე ადგილი დაიკავა. როგორც ეკონომიკისა და მდგრადი განვითარების მინისტრის მოადგილე, ვახტანგ ცინცაძე აღნიშნავს, რეიტინგში ხაზგასმულია ის წარმატება, რომელიც საქართველოს აქვს ეფექტიანი მმართველობის, ასევე იმ რეფორმების მიმართულებით, რომლებიც აუმჯობესებს, ზოგადად, როგორც ქვეყნის, ასევე მიწოდებული სერვისების ეფექტიანობას.

სამინისტროს ინფორმაციით, რეიტინგში საქართველო წინ უსწრებს ევროკავშირის წევრობის კანდიდატ ყველა ქვეყანას (მოლდოვა, ალბანეთი, უკრაინა, სერბეთი, მონტენეგრო, ჩრდილოეთ მაკედონია, თურქეთი და ბოსნია-ჰერცეგოვინა) და ასევე, ევროკავშირის რიგ წევრ ქვეყნებს (უნგრეთი, ბულგარეთი, რუმინეთი). ქვეყნის შეფასება განსაკუთრებით გამოირჩევა შემდეგი მიმართულებებით: „მიმზიდველი ბაზარი“, „ხალხის მდგომარეობის გაუმჯობესებაში დახმარება“ და „ჯანსაღი კანონები და პოლიტიკა“.

ამასთან, 2026 წელს გასულ წელთან შედარებით, ქვეყნის პოზიციები გაუმჯობესდა შემდეგ ინდიკატორებში: პოლიტიკის განხორციელება; შემოსავლის გადანაწილება; სახელმწიფო ბიუჯეტის პროფიციტი; პასპორტის სიძლიერე და პერსონალური უსაფრთხოება.

ვახტანგ ცინცაძე ყურადღებას ამახვილებს, რომ ჩენდლერის ინსტიტუტის ანგარიშში ხაზგასმულია სამთავრობო პროგრამის ფარგლებში საინვესტიციო გარემოს გაუმჯობესებისა და საჯარო სამსახურის/სერვისების მოდერნიზაციის თვალსაზრისით განხორციელებული აქტივობები.

„ანგარიშში ასევე ხაზგასმულია, ზოგადად, ქვეყნის მიმზიდველი და საინვესტიციო გარემოს გაუმჯობესების კუთხით გადადგმული ნაბიჯები. რა თქმა უნდა, აღნიშნული მიმართულებები საქართველოს მთავრობის მნიშვნელოვან პრიორიტეტს წარმოადგენს, ამ კუთხით მთავრობა აგრძელებს ბიზნეს და საინვესტიციო გარემოს შემდგომ გაუმჯობესებას“, - განაცხადა ეკონომიკის მინისტრის მოადგილემ.