ვახტანგ ცინცაძე: ჩვენი მიზანია, რომ მაქსიმალურად შევინარჩუნოთ მაღალი ეკონომიკური ზრდის ტემპი, რათა უზრუნველვყოთ ახალი სამუშაო ადგილების შექმნა

2026 წლის მეორე კვარტალში ეკონომიკური აქტივობის ზრდის პარალელურად შრომის ბაზრის კუთხით პოზიტიური დინამიკა გრძელდება, - აცხადებს ეკონომიკისა და მდგრადი განვითარების მინისტრის მოადგილე, ვახტანგ ცინცაძე.

მისი თქმით, აპრილ-ივნისში საქართველოში უმუშევრობის დონემ 13.8 პროცენტი შეადგინა.

„2026 წლის მეორე კვარტალში გრძელდება უმუშევრობის დონის შემცირების ტენდენცია. კერძოდ, 0.5 პროცენტული პუნქტით არის შემცირებული უმუშევრობის დონე და 13.8 პროცენტს შეადგენს. თუ შევხედავთ რეალურ დასაქმებას (რაც უშუალოდ ეკონომიკურ აქტივობას უკავშირდება) და გამოვრიცხავთ სოციალური დასაქმების პროგრამით დასაქმებულთა რაოდენობას, 2026 წლის მეორე კვარტალში დასაქმებულთა რაოდენობა 27,000-ზე მეტად არის გაზრდილი.

უნდა აღინიშნოს, რომ ჩვენი ერთ-ერთი მთავარი პრიორიტეტია უზრუნველვყოთ ინკლუზიური ეკონომიკური ზრდის შენარჩუნება, კერძოდ ჩვენი მიზანია, რომ მაქსიმალურად შევინარჩუნოთ მაღალი ეკონომიკური ზრდის ტემპი, რათა დავაჩქაროთ ახალი სამუშაო ადგილების შექმნა და პროდუქტიულობის ზრდასთან ერთად უზრუნველვყოთ მოსახლეობის და დასაქმებულების შემოსავლების ზრდა“, - აცხადებს ვახტანგ ცინცაძე.