ზელენსკი ისრაელს სანქციებით ემუქრება

უკრაინის პრეზიდენტმა ვოლოდიმირ ზელენსკიმ განაცხადა, რომ კიევი სანქციებს დაუწესებს იმ ფიზიკურ პირებსა და კომპანიებს, რომლებიც რუსეთის მიერ უკრაინის ოკუპირებულ ტერიტორიაზე არსებულ ხორბალს ყიდულობენ და ისრაელში გააქვთ.

„მოპარულის შეძენა ყველა ნორმალურ ქვეყანაში არის მოქმედება, რომელსაც სამართლებრივი პასუხისმგებლობა მოჰყვება. ეს ეხება, კერძოდ, რუსეთის მიერ მოპარულ ხორბალს. ასეთი ხორბლით დატვირთული კიდევ ერთი გემი ისრაელის პორტში შევიდა და დასაცლელად ემზადება. ეს არ და ვერ იქნება მხოლოდ ბიზნესი. ისრაელის ხელისუფლებამ შეუძლებელია არ იცოდეს, თუ რა ტვირთი შეაქვთ გემებს მის პორტებში“, - დაწერა ზელენსკიმ „ტელეგრამის“ საკუთარ არხზე.

მისი თქმით, უკრაინას ჰქონდა მცდელობები, დიპლომატიური არხების საშუალებით ასეთი ინციდენტები მოეგვარებინა, თუმცა უშედეგოდ. შესაბამისად, როგორც ზელენსკიმ აღნიშნა, მისი ხელისუფლება სანქციებს შემოიღებს.

„უკრაინა, ჩვენს სადაზვერვო ინფორმაციაზე დაყრდნობით, მოამზადებს შესაბამის სასანქციო პაკეტს, რომელიც მოიცავს მათ, ვინც ხორბლის გადატანასთან პირდაპირ არის დაკავშირებული და აგრეთვე იმ ფიზიკურ და იურიდიულ პირებს, რომლებიც ცდილობენ ფული იშოვონ ასეთი კრიმინალური სქემით. მოვახდენთ კოორდინაციას ევროპელ პარტნიორებთან, რათა შესაბამისი პირები სასანქციო რეჟიმში ჩავსვათ“, - დასძინა ზელენსკიმ.