ზელენსკი: უკრაინა რუსულ დარტყმებს ისე უპასუხებს, რომ რუსეთმა ომის გაჭიანურება ვერ შეძლოს

უკრაინის პრეზიდენტმა, ვოლოდიმირ ზელენსკიმ ზაპოროჟიეს, დნეპრის, ხერსონის, ხარკოვის, დონეცკისა და სუმის ოლქებზე რუსეთის მიერ განხორციელებული დარტყმების კომენტირებისას განაცხადა, რომ უკრაინა თავდასხმებს მომავალშიც ისე უპასუხებს, რომ რუსეთს ომის გაგრძელების შესაძლებლობები შეუსუსტოს.

პრეზიდენტის განცხადებით, ზაპოროჟიეში რუსი სამხედროები მიზანმიმართულად ესხმიან თავს სამოქალაქო ობიექტებსა და ტრანსპორტს, რისთვისაც FPV-დრონებსა და სხვა ტიპის უპილოტო საფრენ აპარატებს იყენებენ. ზელენსკიმ დნეპრში სამოქალაქო საწარმოზე მიტანილი დარტყმა უპრეცედენტო სისასტიკედ და აბსოლუტურად უაზრო ქმედებად შეაფასა.

„რუსეთი აგრძელებს თავის ნამდვილად ტერორისტულ ომს უკრაინისა და უკრაინელების წინააღმდეგ. ჩვენ რუსეთს სამართლიანად ვუპასუხებთ ყველა ამ დარტყმის გამო. ჩვენ ამას ვაკეთებთ ისე, რომ პირველ რიგში დაზარალდეს რუსეთის სახელმწიფო სისტემა და მისი შესაძლებლობა, გააჭიანუროს ეს ომი“, - აღნიშნა ზელენსკიმ.

ზელენსკიმ ასევე განაცხადა, რომ რუსეთში საწვავის დეფიციტი ომისა და უკრაინის მიერ შორ მანძილზე დარტყმების ერთ-ერთი შედეგია: „ჩვენ ომის რეალობას რუსეთში ვაბრუნებთ და მაქსიმალურად ვართულებთ ჩვენი მიწის ოკუპაციის გაგრძელებას“.