ზელენსკის განცხადებით, ის მზადაა პუტინს აშშ-ში „დიდი ოცეულის“ სამიტის ფარგლებში შეხვდეს

უკრაინის პრეზიდენტმა ვოლოდიმირ ზელენსკიმ განაცხადა, რომ მზადაა აშშ-ში დეკემბერში დაგეგმილი „დიდი ოცეულის“ სამიტის ფარგლებში რუსეთის პრეზიდენტს ვლადიმერ პუტინს შეხვდეს.

როგორც ზელენსკიმ Deutsche Welle-თან ინტერვიუში აღნიშნა, ის დეკემბერში მაიამიში ჩავა და „დიდი ოცეულის“ სამიტში მიიღებს მონაწილეობას.

„რა თქმა უნდა, ჩვენ ჩავალთ. გავმართავთ შეხვედრებს, ვისაუბრებთ და გადაწყვეტილებებს მივიღებთ“, - განაცხადა ზელენსკიმ.

მისი თქმით, ნაკლები მნიშვნელობა აქვს იმას, თუ რას ეტყვის პუტინს. მისი განცხადებით, მეტად მნიშვნელოვანია შედეგი.

„საუბარია არაა იმაზე, თუ რა სიტყვებს ვეტყვი მე მას [პუტინს] ან რას მეტყვის ის. ამას მნიშვნელობა არ აქვს, მნიშვნელოვანია შედეგი. ეს არის და ეს“, - თქვა ზელენსკიმ.

Deutsche Welle-ს ინფორმაციით, ზელენსკი და პუტინი ერთმანეთს პირისპირ 2022 წლის შემდეგ რუსეთის ომის დაწყებიდან არ შეხვედრილან.

კრემლს ჯერ არ დაუდასტურებია, ჩავა თუ არა პუტინი მაიამიში. რუსეთის ლიდერს „დიდი ოცეულის“ სამიტში მონაწილეობა 2019 წლიდან არ მიუღია.

გასულ თვეს რუსეთის ფინანსთა მინისტრმა ანტონ სილუანოვმა ჩრდილოეთ კაროლინაში „დიდი ოცეულის“ სამიტის ფარგლებში გამართულ შეხვედრაში მიიღო მონაწილეობა, რამაც ევროპელი ოფიციალური პირების უკმაყოფილება გამოიწვია.