ტრამპისა და პუტინის შეთანხმების ფარგლებში, აშშ-ში რუსული დიზელის პირველი პარტია გაიგზავნა

საზღვაო გადაზიდვების მონიტორინგის კომპანია Kpler-ის მონაცემებით, რუსული დიზელით დატვირთული ტანკერი ნიუ-იორკისკენ მიემართება მას შემდეგ, რაც აშშ-ის პრეზიდენტმა დონალდ ტრამპმა ოქტომბრის დასაწყისში მოსკოვთან შეთანხმების შესახებ გამოაცხადა.

მალტის დროშის ქვეშ მცურავმა ტანკერმა Agioi Fanendes-მა რუსეთის ბალტიისპირა პორტ პრიმორსკში დაახლოებით 40 000 ტონა (დაახლოებით 300 000 ბარელი) ულტრადაბალგოგირდოვანი დიზელი ჩატვირთა.

Kpler-ის ცნობით, ხომალდის დანიშნულების პუნქტად ნიუ-იორკია მითითებული, ჩასვლის სავარაუდო თარიღი კი 7 ნოემბერია - აშშ-ის შუალედური არჩევნებიდან ოთხი დღის შემდეგ.

თუ ტვირთი დანიშნულებისამებრ ჩავა, ეს იქნება რუსული დიზელის პირველი პარტია შეერთებულ შტატებში 2023 წლის ივლისის შემდეგ, ხოლო პრიმორსკიდან ნიუ-იორკში დიზელის პირველი მიწოდება 2022 წლის იანვრის შემდეგ. მყიდველისა და გამყიდველის ვინაობა ამ ეტაპზე უცნობია.

ოთხშაბათს რუსულმა საინფორმაციო სააგენტოებმა ენერგეტიკის კურატორი ვიცე-პრემიერის, ალექსანდრ ნოვაკის განცხადება გაავრცელეს, რომლის მიხედვითაც, აშშ-ისკენ მიმავალი რუსული დიზელის პირველი პარტია მომდევნო დღეს დაიძვრებოდა. მან დასძინა, რომ ამას მოჰყვება დამატებითი გადაზიდვები, რადგან რუსული და ამერიკული კომპანიები მიწოდების კონტრაქტებს უკვე ათანხმებენ.

9 ოქტომბერს ტრამპმა ვაშინგტონსა და მოსკოვს შორის შეთანხმება დააანონსა, რაც აშშ-ისა და გლობალური ბაზრებისთვის რუსული დიზელის მიწოდებას და რუსულ საწვავზე ამერიკული სანქციების დროებით შემსუბუქებას ითვალისწინებს. რუსეთი ასევე დათანხმდა დიზელის ექსპორტზე საკუთარი აკრძალვის გაუქმებას.

ტრამპის თქმით, რუსეთი აშშ-ს დაუყოვნებლივ მიაწვდის 300 000 ტონას, რასაც ნოემბერში 500 000 ტონა, ხოლო "ამის შემდეგ დაუყოვნებლივ" 1 მილიონი ტონა მოჰყვება.

ეს ნაბიჯი აღიქმება როგორც მცდელობა, შუალედური არჩევნების წინ ამერიკელი მომხმარებლებისთვის საწვავის ფასები შემცირდეს. გადაწყვეტილებას მწვავე კრიტიკა მოჰყვა უკრაინისა და მისი მოკავშირეებისგან, მათ შორის თავად ტრამპის "რესპუბლიკური პარტიის" წევრებისგან.