ზვიად შალამბერიძე: არ ვურჩევ არავის, რომ საპატრიარქოზე მადისკრედიტირებელი განცხადებებით შეეცადონ პოლიტიკური ქულების დაწერას

არ ვურჩევ არავის, რომ საპატრიარქოზე მადისკრედიტირებელი განცხადებებით შეეცადონ პოლიტიკური ქულების დაწერას, - განაცხადა რეგიონული პოლიტიკისა და თვითმმართველობის საპარლამენტო კომიტეტის თავმჯდომარის პირველმა მოადგილემ ზვიად შალამბერიძემ დოროთე ყურაშვილის განცხადების კომენტირებისას.

მისივე თქმით, ამით დაუპირისპირდებიან იმ 1,5 მლნ ადამიანს, რომელიც პატრიარქის პატივის მისაგებად საათობით იდგა თბილისში.

„ვისაც გაუჩნდება ცდუნება, რომ მსგავსი მადისკრედიტირებელი განცხადებები გააკეთოს საპატრიარქოზე, ყველამ უნდა იცოდეს, მსგავსი ნაბიჯებით ის პირველ რიგში, უპირისპირდება არა მხოლოდ საპატრიარქოს, უპირისპირდება იმ 1,5 მლნ ადამიანს, რომელიც პატრიარქის პატივის მისაგებად საათობით იდგა თბილისში და მთელს ჩვენს საზოგადოებას. შესაბამისად, არ ვურჩევ არავის მსგავსი განცხადებებით შეეცადონ, რომ რაღაც პოლიტიკური ქულები დაიწერონ“, - აღნიშნა შალამბერიძემ.

მღვდელმოქმედება შეჩერებულმა არქიმანდრიტმა, დოროთე ყურაშვილმა ერთ-ერთი მედიის ეთერში თქვა, რომ მეუფე შიო ფსიქიკურად გაწონასწორებული არ არის. მანამდე კი მიხეილ სააკაშვილმა პატრიარქის არჩევნებს „ეგრეთ წოდებული“ და „რუსული სპეცოპერაცია“ უწოდა.