ზვიად შალამბერიძე: მისასალმებელია ეს ურთიერთობა, რადგან ქართველი და უკრაინელი ხალხი ყოველთვის იყო მეგობრულ დამოკიდებულებაში და ეს არის ის ქვეყანა, რომელთანაც არა მარტო მეგობრობა, არამედ პარტნიორობაც აკავშირებდა საქართველოს

ადრე თუ გვიან მოსალოდნელი იყო, რომ მსგავსი ნაბიჯი გადაიდგმებოდა უკრაინის მხრიდან, - განაცხადა გადაცემაში „დღის ქრონიკა“ რეგიონული პოლიტიკისა და თვითმმართველობის საპარლამენტო კომიტეტის თავმჯდომარის პირველმა მოადგილემ ზვიად შალამბერიძემ.

მისივე თქმით, მიუხედავად უკრაინის არამეგობრული დამოკიდებულებისა, საქართველო მაინც აგრძელებდა ცალმხრივ მეგობრობას მასთან.

„ჩვენ არაერთხელ გვითქვამს, რომ ბოლო 4 წლის განმავლობაში მიუხედავად იმისა, რომ უკრაინის ხელისუფლების მხრიდან ძალიან ბევრი არამეგობრული ნაბიჯი გადაიდგა ჩვენი ქვეყნის მიმართ, ჩვენ ვამბობდით, ყოველთვის რომ ვინარჩუნებთ ცალმხრივად მეგობრობას უკრაინასთან და უკრაინელ ხალხთან. რა თქმა უნდა ვუსურვებთ და ვუსურვებდით გამარჯვებას.

მისასალმებელია ეს ურთიერთობა, რადგან ქართველი და უკრაინელი ხალხი ყოველთვის იყო მეგობრულ დამოკიდებულებაში ერთმანეთის მიმართ და ეს არის ის ქვეყანა, რომელთანაც არა მარტო მეგობრობა, არამედ პარტნიორობაც აკავშირებდა საქართველოს. ის დაძაბული ურთიერთობა, რაც იყო პირდაპირ გამოწვეული უკრაინის ხელისუფლების მხრიდან, თუ განიმუხტება, ამას მხოლოდ მივესალმებით“, - აღნიშნა ზვიად შალამბერიძემ.

რეგიონული პოლიტიკისა და თვითმმართველობის საპარლამენტო კომიტეტის თავმჯდომარის პირველმა მოადგილემ თქვა, რომ არის საკითხები, რომელიც საქართველოსთვის არის წითელი ხაზი და რომლის მოგვარების შემდეგაც აღდგება დიპლომატიური ურთიერთობა.

„ეს არიან ის ადამიანები, რომლებიც ჩვენი ქვეყნის მხრიდან არიან ძებნილი და რომლებიც იყვნენ წითელი ცირკულარით ძებნილი და დღეს ვხედავთ, რომ ეს ადამიანები ჩაუდგნენ სათავეში უკრაინის ინტერპოლს. არიან კიდევ სხვა ადამიანები, რომლებიც დღეს აფარებენ უკრაინას თავს, მაგრამ ჩვენი სამართალდამცავი ორგანოების მხრიდან არიან ძებნილი. ეს არის ერთ-ერთი მიმართულება, რომელიც უნდა მოაგვაროს მხოლოდ უკრაინულმა მხარემ და ამის შემდეგ იქნება შესაძლებელი საუბარი მათთან დიპლომატიური ურთიერთობის აღდგენაზე.