ევროკავშირი მოლდოვას საშუალო რადიუსის საჰაერო თავდაცვის სისტემას დაუფინანსებს - Netgazeti

ევროკავშირის საბჭომ, ევროპის მშვიდობის ფონდის ფარგლებში, მოლდოვის შეიარაღებული ძალების მხარდასაჭერად 120 მილიონი ევროს გამოყოფის გადაწყვეტილება მიიღო.

აღნიშნული დახმარების ფარგლებში დაფინანსდება საშუალო რადიუსის მოქმედების საჰაერო თავდაცვის სისტემა. ევროკავშირის თანახმად, ეს ზომა ავსებს ევროპის მშვიდობის ფონდის ფარგლებში განხორციელებულ წინა დახმარების ღონისძიებებს, რომლებიც საჰაერო სივრცის მონიტორინგისა და საჰაერო თავდაცვის მხარდაჭერას ისახავდა მიზნად.

„ეს მხარდაჭერა მოლდოვის შეიარაღებულ ძალებს საშუალებას მისცემს, გააუმჯობესონ ოპერატიული ეფექტიანობა და, შესაბამისად, უკეთ დაიცვან მშვიდობიანი მოსახლეობა. ამ ახალი ღონისძიებით ევროპის მშვიდობის ფონდის ფარგლებში მოლდოვისთვის გაწეული ევროკავშირის ჯამური დახმარება 317 მილიონ ევროს აღწევს“, — აცხადებს ევროკავშირი.

ევროპის მშვიდობის ფონდი 2021 წლის მარტში შეიქმნა საგარეო და უსაფრთხოების საერთო პოლიტიკის (CFSP) ფარგლებში სამხედრო და თავდაცვის სფეროებში განხორციელებული ყველა ქმედების დასაფინანსებლად. ევროპის მშვიდობის ფონდი ევროკავშირს საშუალებას აძლევს, დააფინანსოს მესამე ქვეყნების, ასევე რეგიონული და საერთაშორისო ორგანიზაციების შესაძლებლობები სამხედრო და თავდაცვის საკითხებში.

„ეს დროსთან რბოლაა და ჩვენ მოგებას ვაპირებთ“ | EU-მოლდოვის სამიტის შედეგები

25 წელია ვწერთ იმაზე, რაც შენ გაწუხებს და რასაც მთავრობა გიმალავს, თუმცა დღეს, რეპრესიული პოლიტიკის პირობებში, როდესაც დამოუკიდებელ გამოცემებს „ქართული ოცნება“ შემოსავლის წყაროს უკეტავს, ამას მარტო ვეღარ შევძლებთ.ჩვენ არ ვეკუთვნით არცერთ პოლიტიკურ ძალას და ბიზნესჯგუფს. ჩვენ ვეკუთვნით საზოგადოებას.დღეს შენი მხარდაჭერა გვჭირდება: გახდი „ბათუმელებისა“ და „ნეტგაზეთის“ მხარდამჭერი, თუნდაც თვეში 1 ლარიდან.წესებსა და პირობებს დეტალურად შეგიძლია გაეცნო მხარდაჭერის პლატფორმაზე.